«Дүйсекеннің әкімі» Гүлжан

Аймақтар

04.11.2016, 17:09

Локоть – Семей телімінің 629,8 шақырымында орын тепкен Дүйсекен жол айрығында тек теміржолшылар тұрады. Сыңсыған қалың орман ішіндегі шағын станция ғимараты ағаштан салынған, ертегідей ескі көрінгенмен сүйегі мықты. Қызмет көрсетіп тұрғанына биыл 102 жыл толады. Теміржол саласында жиырма жылдан астам еңбек өтілі бар станция басшысы Гүлжан Бекмұхаметқызын жергілікті теміржолшылар «Дүйсекеннің әкімі» дейді екен. Айтса айтқандай, табиғатынан тынымсыз, шектен тыс жауапкершілік қасиеті бар теміржолшы келіншек өзін осы жол айрығындағы барлық жұмысқа жауапты санайды. Биыл бой көтергеніне ғасырдан асқан станция ғимаратына биыл бекет бастығының жетекшілігімен ағымдағы жөндеу жұмыстары жүргізілген. Ғимарат ішіндегі жылыту жүйесі күрделі жөндеуден өткізілген. Үстел-орындық, шкаф тәрізді қажетті кеңсе заттары толықтай жаңартылған. Шаруашылыққа қатысты мәселе жоқ. Ағаш-отын түсірілген, көмір жеткізілген. Гүлжан Түсіпқанова үшін аптаның дүйсенбісі аса маңызды. Бұл күн белгіленген тәртіп бойынша «Станция бастығының күні». Тексеру шаралары қалыптасқан дағды бойынша таңертеңгісін бағыттама басынан басталады. Қасына жолшылар бригадирі мен электромеханикті ертіп алып, жолға шығатын станция бастығының назарынан ештеңе тыс қалмайды. Желіге тиесілі жол бойы мен СОБ құрылғылары, бағыттамалы бұрмалар, байланыс желілері түгелдей сүзгіден өтіп, ғимараттарға келіп бір-ақ тіреледі. Гүлжан Бекмұхаметқызы кінәрат жібергендерге қатал. Қолтығына қыстырған «ДУ-46» журналына табылған ақаулықтарды тіркеп жазып, оны қалпына келтіру мерзімін де белгілеп қояды. Бір бұл емес, қорытынды хаттама да толтырады. Жұбайым екеуміз қол ұстасып теміржол саласына бірге келдік. Қазірде жұбымыз жазылмай бірге еңбек етудеміз. Ол станция кезекшісі. Балаларымыз мектеп жасында. Бүгінде осынау шағын болса да табиғаты көркем, тарихы үлкен станцияда қызмет етіп жатқан он шақты теміржолшылар отбасы бір шаңырақ астында тұрып жатқандай татумыз, – дейді Гүлжан Бекмұхаметқызы. Алғашқы қызмет жолын Жаңа-Семей станциясында техникалық кеңсе қызметкері ретінде бастаған Гүлжан түптің түбінде станция бастығы болуды армандаған екен. «Адал еңбек етіп, іскерлігіңмен танылсаң неге болмасқа...» деп ойлайды екен. Міне, арманы алдамады, шағын болса да жүк тасымалы үшін маңыздылығы бір де кем емес станцияны басқарып, саланың өркендеуіне өз үлесін қосып отыр.

«Дүйсекеннің әкімі» Гүлжан

Басқа да жаңалықтар