Жамбыл жүк тасымалы бөлімшесінде бірнеше спорт түрінен өткен жарыста ардагерлер ешкімге дес бермеді
Жамбыл жүк тасымалы бөлімшесінде теміржолшылар арасында спорттың бірнеше түрінен жарыс өтті. Бір қызығы, жүлделі орындардың денін ардагер теміржолшылар еншіледі. Тәуелсіздіктің 30 жылдық мерейтойы құрметіне өткен спорттық жарыстарға қатысушыларға бөлімше директорының орынбасары Айдын Пайзылдаұлы жеңіс тіледі. Спорттың бірнеше түрінен қатар басталған бәсеке ә дегеннен қызу қарқын алып, шиеленісті өрбіді. Дегенмен, жарыстың аты жарыс, нәтижесінде дойбы ойнаудан алдына жан салмаған ардагер Асқар Қырымбаев жүлделі бірінші орынды еншілесе, шахматтан да ардагер-теміржолшы Виталий Соконовке тең келетін ешкім болмады. Кіші теннистен де ардагер Ринат Өтешов көш бастаса, дартс ойынынан теміржолшы Владимир Белоногов топ жарды. Отыздан астам теміржолшылар мен сала ардагерлері бақ сынасқан бәсекеде екінші, үшінші орын алған жүлдегерлердің де есімдері аталып, барлық жеңімпаздар арнайы дипломдармен, сый-сияпаттармен марапатталды.