Жолшылар жеті мәрте жүлде алды
Абай облысы бойынша меншікті тілші
Жуырда Семей ЖТ бөлімшесінде волейболдан кезекті аймақтық біріншілік өтті. Аталған шараға алдын ала іріктеуден өткен сегіз команда қатысып, өзара шеберлік сынасты.
Үш партиядан тұратын ойын барысы мейлінше тартысты өрбіді. Ақтық финалға жету жолында барлық командалар аянып қалмады. Ойынның соңғы шешуші сәттері қарсылас командалардың алма-кезек қарымта алмасуымен жалғасты. Бұл мезгілде жанкүйерлердің де дегбірі таусылған болатын. Әйтсе де, жарыстың аты жарыс, біреуінің бағы жанып, бірінің бабы жетпей жатады. Бұл жолы да суырылып алға шыққан жолшылар командасы ұпай саны бойынша өзге қарсыластарын айқын басымдықпен жеңді. ПЧ-39 командасы осылайша жыл ішінде жетінші мәрте жүлдегер болып, бөлімше чемпионы атанды.
Келесі екінші орын ТЧЭ-24 машинистеріне бұйырды. Ұпай саны бойынша жолшыларға есе жібергені болмаса, локомотившілер де тәп-тәуір ойын көрсетті.
Ал жүлделі үшінші орынға Жаңа-Семей жол дистанциясының жолшылары тұрақтады. Олар ақтық сында ӘТЖК Семей филиалының командасын жарыс жолынан ығыстырған болатын.
Сайыстың қорытындысында бөлімше директоры Владимир Бабиченко сөз алып, жеңімпаздарды құттықтап, жүлдегер командаларды арнайы естелік сыйлықтар және дипломдармен марапаттады.