Қызылордада волейболдан турнир өтті

Қызылорда магистральдық желі бөлімшесінің белсенді жастарының ұйымдастыруымен «Еңбегі ұрпаққа өнеге. Сіз біз үшін қымбатсыз!» деген ұранмен пайғамбар жасына жеткен ұжым басшысы, Құрметті теміржолшы, Қызылорда қалалық маслихатының депутаты Ибраким Басықараевтың құрметіне «Сейхун» сауықтыру кешенінде волейбол турнирі өтті.    

Тарлан теміржолшының ерен еңбегін үлгі етіп, теміржолшылар арасында салауатты өмір салтын насихаттау мақсатында өткен спорт сайысы қызыққа толы болды. Екі топқа бөлінген 4 құрама команда арасында айқыш тәсілімен өткізілген турнирде Қызылорда қалпына келтіру пойызының «ВП-41» құрамасы, Қызылорда магистральдық желі бөлімінің жеке шаруашылығы ұжымының қос командасы «НЖС-2» мен «НЖС-1» және Қызылорда өрт сөндіру пойызының «Норпож» құрамалары арасында аса тартысты бәсеке өрбіді. Біріне бірі дес бермей, қызу ойын ақыры мәреге жетіп, Қызылорда қалпына келтіру пойызының «ВП-41» құрамасы жүлделі 3-орынды қанағат тұтса, Қызылорда магистральдық желі бөлімінің «НЖС-2» командасы 2-орынды иеленді. Ал турнирдің басты сыйлығы мен жүлдесін Қызылорда магистральдық желі бөлімінің «НЖС-1» құрама командасы еншіледі. Ойынның үздік қорғаушысы М.Ермашов, үздік шабуылшы Ш.Батырханұлы, үздік ойыншы А.Шәкірбек танылды. «Қазкөліккәсіп» ҚБ филиалы төрағасы Бауыржан Ахметов жүлдегерлерге естелік сыйлықтар мен арнайы диплом мен кубок, бағалы сыйлықтар табыстады. Ибраким Басықараев өз атынан арнайы жүлде тағайындап, табыс етті.  

Аймақ теміржолының өркендеуіне сүбелі үлес қосқан майталман теміржолшының құрметіне орайластырылған спорт додасы үлкен мерекеге ұласып, оған қатысушылар да, жанкүйерлер де риза болып тарасты. Саналы ғұмырын Сыр елінің теміржолын дамытуға сарп еткен Ибраким Асқарұлының атына ыстық ықылас пен құрметке толы лебіздер айтылып,  зейнет  жасына жетіп отырған тарлан теміржолшының артына қалдырған өнегелі ізі жастарға үлгі етілді.  

– Менің әріптестерім, шәкіртім, әрқайсыңыздың  орныңыз мен үшін ерекше. Менің еңбегімді елеп, бағалап, осындай бұқаралық іс-шара ұйымдастырып отырған ұжымға алғысым шексіз. Қазақтың теміржолы, оны жасаушы нар тұлғалы теміржолшылар жасасын! – деп тілегін білдірді жиынды қорытындылаған  Ибраким Асқарұлы.