Тәуелсіздік күніне орай теміржолшылар арасында волейболдан жарыс өтті

Қазақстан Республикасының тәуелсіздік күніне орай «Қазтеміржолкәсіп» ҚБ Қызылорда филиалының бастамасымен Қызылорда станциясында волейболдан дәстүрлі турнир ұйымдастырылды. Теміржолшылар арасындағы бұл спорттық жарыс ұлық мерекенің мазмұнын тереңдетіп, ұжымдар арасындағы ынтымақ пен серіктестікті нығайта түсті.

Турнирдің ашылу салтанатында «Қазтеміржолкәсіп» ҚБ Қызылорда филиалының төрағасы Бауыржан Ахметов, спорт секторының жетекшісі Бақытжан Имбергенов және мекемелердің кәсіподақ ұйымдары басшылары қатысушыларды айтулы мерекемен құттықтап, Тәуелсіздік мерекесі қарсаңындағы спорттық бәсекенің достық пен ауызбіршілік рухында өтуіне тілектестік білдірді. Олар командаларға сәттілік тілеп, әділ бәсеке мен спорттық мәдениетті басты қағида ретінде ұстануға шақырды.

Қалалық спорт алаңында өткен турнирге Қызылорда станциясындағы салалық мекемелердің бес бірдей құрама командасы қатысты. Атап айтқанда, Қызылорда локомотив пайдалану депосының «ТЧЭ-34», Қызылорда электрмен жабдықтау дистанциясының «ЭЧ-25», Қызылорда жол дистанциясының «ПЧ-57», Қызылорда магистральдық желі бөлімшесінің «НЖС-10» және Белкөл станциясының «ДС Белкөл» командалары тартысты ойын өрнегін көрсетті.

Ойын барысында теміржолшылардың волейболдан жақсы дайындықта екені байқалды. Дәл пас беру, нәтижелі шабуыл, ұтымды қорғаныс, сенімді қабылдаулар көрермендерге нағыз спорттық әсер сыйлады. Әсіресе шешуші сәттердегі шабуыл комбинациялары мен допты алаңға дәл бағыттау шеберлігі командалардың тәжірибесін айқын көрсетті.

Тартысқа толы жарыс қорытындысы бойынша І орынды Қызылорда магистральдық желі бөлімшесінің «НЖС-10» командасы жеңіп алды. ІІ орын Қызылорда электрмен жабдықтау дистанциясының «ЭЧ-25» командасына бұйырса, ІІІ орынды Қызылорда локомотив пайдалану депосының «ТЧЭ-34» командасы иеленді.

Жүлделі орын алған командаларға мекемелердің кәсіподақ ұйымдары арнайы әзірлеген грамоталар, медальдар және бағалы сыйлықтар табысталды. Осылайша, Тәуелсіздік күніне арналған волейбол турнирі теміржолшылардың салауатты өмір салтын ұстанатынын, спорттық ойындарға тән терминдер мен ойын тактикасын жетік меңгергенін көрсетіп, ұжымдық рухты одан әрі нығайтты.