Шу станциясында үстел теннисінен жарыс өтті
"Қазақстан теміржолшысы" газетінің Жамбыл облысындағы меншікті тілшісі
Шу станциясының вагондарға техникалық қызмет көрсету орталығында үстел теннисінен командалық жарыс өтті.
Жарыста вагон қараушылар, үш цехтың жұмысшылары, кеңсе қызметкерлерінен құралған және Бірліктен келген 8 команда өзара сынға түсті. Жалпы үстел теннисінен топтық ойындар «Корбиллон кубогы» жүйесінің жаңартылған нұсқасымен өткізілетіні белгілі. Айталық, А – Х, В –У топтары өзара кездесу өткізіп, келесі айналымда қарсыластар орны ауысады. Әр матч 3 геймнен тұрады, команданың бірі 11 ұпай жинағанша жалғасады. Негізгі кездесу 3 жеңіске дейін жалғасады.
– Әр топ үш ойыншыдан құралды. Ұжым ішінде ынтымақты нығайту, командалық рухты қалыптастыру үшін жарыстың осы түрін таңдадық. Жалпы спорттық жарыстар жұмысшылар арасында ішкі бірлікті күшейте түсетінін байқаймын, – дейді Шу техникалық қызмет көрсету орталығының бастығы Айдын Қарамолдаев.
Тартысты өткен жарыста аға вагон қараушы Қайрат Өмірбековтің командасы 1-орынды олжалады. Финалдық ойында есе жібергенімен, соңына дейін жеңіс үшін барын салған Жандар Көпековтің ойыншылары 2-орынды еншіледі. Алғашқы матчтардан-ақ фовориттер қатарынан көрінген Жалғас Байсеитов бастаған топ үздік үштікті түйіндеді.
Жарыс соңында қатысушылар Алғыс хаттармен марапатталса, жеңімпаздарға кәсіподақ ұйымының атынан бағалы сыйлықтар табыс етілді.