Шудағы тартысты ойын
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының спорт нұсқаушыларының ұйымдастыруымен Шу станциясында волейболдан тораптық жарыс өтті.
Волейболдан жамбылдық теміржолшылардың құрамасы – аймақтық, республикалық жарыстарда олжа салып жүрген команда. Құрылымдық бөлімшелерде өңірлік филиалдың намысын қорғап жүрген жақсы ойыншылар бар. Сондықтан тораптық бәсеке аса тартысты өтіп, жеңімпаздарды анықтау үшін айналмалы жүйе таңдалды.
– Жамбыл кәсіподағының іс-шаралар кестесінде жыл ішінде жоспарланған бұл тораптық турнир күткеніміздей тартысқа толы болды. Қашан да волейболдағы бәсеке жоғары. Себебі, құрылымдық бөлімшелерде өңірлік құрама сапында ойнайтын волейболшылар бар. Ал бұл ойынның бір ерекшелігі – командада байланыстырушы екі мықты ойыншы болса, соның өзі көп нәрсені шешеді. Олар өздері-ақ қарсы шабуылдарды ұйымдастыра алады, – дейді кәсіподақ ұйымының спорт бойынша нұсқаушы-ұйымдастырушысы Евгений Тян.
Жарыс барысында әр партияда тартыс қызып, қарсыластар бір-біріне дес бермей, теңбіл доп әлсін әлсін торда тулап, тараптардың жүйкесін жұқартты. Дегенмен, сайыстың аты – сайыс. Турнир қорытындысы бойынша жүлделі орындарды ТЧЭ-30, ШЧ-35 және ЭЧ-22 командалары иеленді. Жарысқа қатысушылар кәсіподақ ұйымының атынан грамоталармен, кубоктармен, медальдармен, бағалы сыйлықтармен марапатталды.