Тараз командасы – чемпион!
"Қазақстан теміржолшысы" газетінің Жамбыл облысындағы меншікті тілшісі
Астанада «Әскерилендірілген теміржол күзеті» ЖШС филиалдары арасында өткен спартакиададан Тараз филиалының құрама командасы жеңіспен оралды.
Әскерилендірілген теміржол күзетінің 105 жылдығына арналған спорттық додаға 11 филиал мен орталық аппарат, жалпы 12 команда қатысты. Қатысушылар армрестлингтен, футзал және асық ату жарыстарында бақ сынады.
– Наурыз айында филиалдың жеке құрамдары арасында үш спорт түрі бойынша іріктеу өткізген болатынбыз. Жеңімпаздарға жекелеген жарыстар бойынша жолдама бердік. Ал футзалдан әр командадан үздік ойыншыларды анықтап, құрамаға қостық. Нәтижесінде асық атудан – бірінші орын, шағын футболдан – екінші орынға ие болдық. Бір алтын, бір күміс жүлдемен жалпы командалық есепте алға шықтық. Команданың дайындығы жоғары болды. Бастысы әр қатысушының ішкі рухын көтеріп, моральдық тұрғыда қолдап отырдық. Спортшыларымыздың ауызбіршілігі мен жеңіске деген ұмтылысының арқасында спартакиаданың чемпионы атандық, – дейді дүбірлі додаға команданы өзі бастап барған «Әскерилендірілген теміржол күзеті» ЖШС Тараз филиалының директоры Еркін Мүсілімов.
Астанадан үлкен олжамен оралған чемпиондарды «Әскерилендірілген теміржол күзеті» ЖШС Тараз филиалының ұжымы Тараз вокзалында зор қуанышпен салтанатты жағдайда күтіп алды. Ұран сөздер жазылған банер жасатып, гүл шоқтарын тапсырып, қошемет көрсетті.
Бұл жеңіс филиалдың жеке құрамдарының командалық рухын көтеріп, ауызбіршіліктерін нығайта түскені анық.
