Жолшылар мен машинистер арасындағы тартысты дода
Қызылорда облысы бойынша меншікті тілші
Мамыр айының соңғы аптасында аймақтың солтүстігіндегі тораптық станцияларда «Қазтеміржолкәсіп» ҚБ төрағасы кубогының іріктеу жарысы өтті. Сексеуіл – Қазалы станцияларындағы салалық мекемелер арасында шағын футболдан дәстүрлі түрде өткізілетін спорттық сайыс аймақ теміржолшылары арасында салауатты өмір салтын насихаттауға серпін берді.
Сексеуіл торабында өткен тартысты додада ПЧ-59, ТЧЭ-36, ВЖДО және ВЧДЭ-6 командалары бақ сынады. Іріктеу ойынының нәтижесінде вагоншылар командасы 3-орынға табан тіреді. Жүлделі 2-орынды Сексеуіл локомотив пайдалану депосының ойыншылары иеленсе, Сексеуіл жол дистанциясының жігіттері 1-орынды қанжығаға байлап, турнирдің келесі айналымына өтті.
Ал Қазалы торабындағы салалық мекемелер арасында өткен сайысқа ШЧ-40, ПЧ-60, ЭЧ-26, НОРПОЖ және ТД-23 командалары қатысып, өзара мықтыны анықтады. Ойын қорытындысы бойынша қазазылық жолшылар 3-орында иеленіп, екінші орынға Қазалы белгі беру және байланыс дистанциясының командасы көтерілді. Ал Қазалы айналым депосының машинистер құрамасы жеңіске жетіп, келесі кезеңге бас тіреді.
Турнир соңында жеңімпаздар мен барлық қатысушыларға кәсіподақ ұйымы атынан қаржылай сыйақылар, кубоктар, медальдар және дипломдар табысталды. Іріктеу турнирі тек спорттық сайыс қана емес, сонымен қатар теміржол саласы қызметкерлерінің салауатты өмір салтын ұстанып, бұқаралық спортты дамытуға деген ынтасының айқын көрінісі болды. Бұл марапаттар олардың спортқа деген сүйіспеншілігі мен қажырлы еңбегінің лайықты бағасы болды.