Шу станциясында теміржолшылар арасында тораптық жарыс өтті
"Қазақстан теміржолшысы" газетінің Жамбыл облысындағы меншікті тілшісі
«Қазтеміржолкәсіп» ҚБ Жамбыл филиалының спорттық-бұқаралық іс-шараларының күнтізбелік жоспарына сәйкес Шу станциясында арқан тарту және дартс атудан тораптық жарыстар ұйымдастырылды.
Теміржолшылардың спорттық бабы сыналған бәсекеде ШЧ-35 Шу белгі беру және байланыс дистанциясы екі бірдей командасын додаға қосты. Бір құрылымдық бөлімшеде еңбек еткенімен, айналымдық жүйеде өткен арқан тарту жарысында қос топтың спортшылары бір-біріне лайықты қарсылас бола білді. Жеңісті қолдан бермеу үшін барын салып, ШЧ-35-1 жеңіске жетті. Ақтық бәсекеге дейін жеткен ЭЧ-22 құрамасы екінші орынды еншіледі. Ал ШЧ-35-2 ойыншылары үздік үштікті түйіндеді.
Әйелдер арасында өткен дартстан Шу электрмен жабдықтау дистанциясының шебері Светлана Югайдың жолы болды. Ал Шу белгі беру және байланыс дистанциясының инженері Марал Тәттімбетова екінші орынды иеленсе, электромонтер Алтынай Нұрманова қола жүлдені қанағат тұтты.
Жеңімпаздар мен жүлдегерлер арнайы дипломдармен марапатталып, кәсіподақ ұйымы атынан бағалы сыйлықтарға ие болды.