Қытай Тибетте тағы бір теміржол салмақ
Қытай темір жолдары (CR) жуырда Тибет астанасы Лхасада орналасқан Xinjiang — Xizang Railway компаниясын құрды, деп хабарлайды Rail-news.kz.
Мемлекеттік нарықты реттеу басқармасының мәліметінше, бұл – елдегі ең ауқымды көлік жобаларының бірін жүзеге асыру жолындағы маңызды қадам. Компанияның жарғылық капиталы 95 млрд юаньды (шамамен 13,22 млрд АҚШ доллары) құрайды, жалғыз корпоративтік акционері – CR.
Жаңа компанияның міндеті – Синьцзян – Сицзан теміржолын салу және оны кейін пайдалану. Бұл желі Синьцзян-Ұйғыр автономиялық ауданының оңтүстік-батысындағы Хотан станциясынан басталып, Тибет автономиялық ауданындағы Шигадзе және Лхаса қалаларына дейін созылады.
Синьцзян – Сицзан теміржолы Қытай Көлік министрлігі 2025 жылғы ақпанда жариялаған 45 ірі жобаның қатарына кіреді. Негізгі құрылыс жұмыстары осы жылдың соңына дейін басталуы жоспарланған. Бұл бағыт – елдің әр аймағын Тибетпен байланыстыратын бес желінің бірі. Олардың біреуі – Цинхай – Сицзан теміржолы қазір жұмыс істеп тұр. Сондай-ақ Сычуань – Сицзан магистралінің құрылысы жүргізіліп жатыр. Алдағы уақытта Ганьсу және Юньнань провинцияларын Тибетпен жалғайтын тағы екі бағыт салу көзделген.