Қыс шанаңды жаз сайла

Ел шығысындағы қатты отын мәселесі биыл жылдағыдан ертерек қолға алынды. Өткен жылғыдай қарбалас орын алып, тапшылық туындамауы үшін жергілікті тұтынушылар облыс басшылығының тапсырмасымен көмірді мамыр айынан сатып ала бастады. Ал, бұл жайт теміржолшылар үшін көмір тасымалын ширату қажеттігін тудырды. Осы мақсат аясында Семей ЖТ басшылығы облыстық және қалалық әкімдіктермен бірге негізгі номенклатуралық жүктерді тиеу мен тасымалдауды арттыру бойынша арнайы кездесулер өткізген болатын. Тіпті, өткен айдың соңында қалалық әкімдіктер «Қаражыра» АҚ-мен меморандумға қол қойды. Соның аясында алдағы жылу беру маусымына ертерек даярланып, аймақтағы жылу беру көздерін көмір қорымен жетекілікті әрі үзіліссіз қамтамасыз ету шаралары межеге алынды. Сондай-ақ, теміржолшылар «Қаражыра» АҚ басшылығымен және облыстағы өзге де көмір қабылдаушы клиенттермен келіссөздер жасап, жаз айларында, яғни, дәл қазіргі күндері көмір тасымалын ұлғайту ісі мейлінше қарқынды әрі табысты түрде жүргізілуде. Нәтижесінде бүгінгі таңда көмір тиеу өткен жылдың есепті мерзімімен салыстырғанда 590,0 тоннаға ұлғайып, 3096,9 мың тонна отынды құрап отыр. Мәселен, теміржолшылар бір ғана облыстық жылу электр орталығының қажеттілігі үшін мамыр-маусым айларында 90 мың тонна көмір жеткізіпті. Бұл көрсеткіш өткен жылғыдан 3,3 есе көп екен. Тұтыну мөлшерінің былайша артуына тек алдағы қысқа даярлық қана емес, облыс әкімінің тапсырмасымен Семей қаласында жазғы маусымда да ыстық судың үзіліссіз берілуі себеп болып отыр. Жалпы, ішкі сұраныс үшін көмір тасымалы әлі артатын болады. Себебі, өткен жылы шағын қазандықтар мен кәсіпорындар көмірді жаппай күзде сатып ала бастағандықтан елді мекендердегі көмір тиейтін жерлерде тапшылық байқалып, ұзын-сонар кезек туындаған болатын. Биыл оның қайталанбауы үшін алдын алу жұмыстар атқарылып жатыр. Әкімдіктер әр мекеме мен жылу орталықтарының көмірді кестеге сай сатып алуын, жеткізілуін қатаң қадағалауға алған. Ал, жазғы мерзімде дәл осындай көмір қарбаласы соңғы 20 жылда орын алмапты. Семей ЖТ бөлімшесінің басшысы Марлен Көкірекбаевтың айтуынша, қазіргі күні экспортқа шығарылатын көмір динамикасының да артуы байқалып отыр. Атап айтсақ, 1-ші шілде күнгі көрсеткіш бойынша экспортқа жіберілген көмір 511,2 мың тоннаға жетіп, 181 пайызды құрапты. Бұл көрсеткіш өткен жылдың осы мерзімімен салыстырғанда 229,6 тоннаға артық деген сөз. Жалпы, бұл тараптағы көрсеткіш соңғы үш жыл қатарынан қарқынды түрде артып келеді екен. Ал, тиелінген көмірді уақытында, қауіпсіз әрі мол көлеммен жеткізу үшін Семей ЖТ бөлімшесі тарапынан ауыр салмақты ұзын жылжымалы құрамдар мен тыңнан қолға алынған эксклюзивті жоба – «шаттл» пойыздары қолданылуда.   Қуаныш Қожаев, Семей