ҚТЖ астық тасымалы үшін локомотив паркін ұлғайтуда
"Қазақстан теміржолшысы" газетінің тілшісі
Астық жүктерін тасымалдауды қамтамасыз ету үшін ҚТЖ-да жылжымалы құрамның саны жеткілікті. «ҚТЖ-Жүк тасымалы» ЖШС инвентарлық паркінде 1,6 мыңнан астам локомотив бар. Бұл туралы ҚТЖ-да өткен брифингте "ҚТЖ-Жүк тасымалы" ЖШС Бас директорының маркетинг және жоспарлау жөніндегі орынбасары Саламат Әбжалиев айтты.
Оның айтуынша, «ҚТЖ-Жүк тасымалы» ЖШС-і 2023 жылы 112 локомотив сатып алған. 2024 жылы 185 бірлік локомотив сатып алу жоспарланған, соның ішінде 119 бірлігі жеткізілген.
«2029 жылға дейін 374 заманауи локомотив жеткізіледі. Сонымен қатар, «CRRC Corporation Limited» қытайлық корпорациядан 100 маневрлік және 100 магистральдық локомотив сатып алынады, аталған келісім бойынша алғашқы локомотивтер Алтынкөл станциясында жұмыс істеп жатыр», - деді С. Әбжалиев.
Сонымен қатар ол 2024-2025 жылғы астық науқанына дайындық аясында маневрлік локомотивтер паркін ұлғайту шаралары қолға алынғанын айтты. Жыл басынан бері «Локомотив құрастыру зауыты» АҚ зауытында құрастырылған ТЭМ-11А 0015 және ТЭМ-11А 0016 сериялы 18 заманауи маневрлік тепловоз әкелінген. Бұл локомотивтер Астана, Жаңа-Есіл және Жезқазған деполарының паркін толықтырған.
«Астық тасымалдау бойынша көшбасшы Қостанай және Ақмола жүк тасымалдау бөлімшелері маневрлік локомотивтермен толық қамтамасыз етілген. Бұл шаралар астық тасымалы жоспарларының мүлтіксіз орындалуын қамтамасыз ете отырып, негізгі темір жол учаскелеріндегі маневрді айтарлықтай жақсартады», - деді ол.
Айта кетсек, елімізде 16 мыңға жуық жабық вагон бар. Оның 32% астамы «Қазтеміртранс» АҚ-ға, қалғандары жеке қазақстандық және шетелдік операторларға тиесілі. Астық тасымалдаушылардың жалпы паркі 11,8 мыңнан асады. Оның 2%-і «Қазтеміртранс» АҚ, қалғаны жеке операторларға тиесілі. Бұл барлық келісілген тасымалдау жоспарларын орындау үшін жеткілікті көрінеді.
Сондай-ақ астықты үздіксіз тасымалдау үшін станция қызметкерлерінің штаты ұлғайтылған. Әсіресе Ақмола өңірінің Көкшетау, Бауман, Тальщик станцияларында қосымша жүктерді қабылдап тапсырушылар тартылған. Қостанай өңірінің Қостанай, Құсмұрын және Сарыкөл станцияларына жүктерді қабылдап тапсырушылар, пойыздарды құрастырушылар және тауар кассирлері жұмылдырылыпты.
