Жамбыл өңірінде көмірге сұраныс әлі де бар
"Қазақстан теміржолшысы" газетінің Жамбыл облысындағы меншікті тілшісі
Жамбыл өңірінде жылу беру маусымы басталды. Жылдан-жылға табиғи газбен жылытуға көшкен бюджеттік мекемелер мен жеке тұрғын үйлер саны арта түскенімен, әлі де қатты отынға сұраныс бар.
Биыл облыста бюджеттік ұйымдардың автономды қазандықтарын 61,3 мың тонна көмірмен қамтамасыз ету жоспарланған. Ал халықтың күзгі-қысқы маусымда жоспарлы көмір отынын тұтыну көлемі 144,8 мың тоннаны құрайды.
Жамбыл облысы әкімдігінің энергетика және тұрғын үй-коммуналдық шаруашылық басқармасының басшысы Ғалым Исақовтың айтуынша, жылыту маусымы кезеңінде бюджеттік ұйымдардың автономды қазандықтары үшін жоспарланған 61,3 мың тоннаның 52 мың тоннасы немесе 85 пайызы жеткізілген. Тұрғындар 55 мың тонна көмірмен қамтылған. Бұл – күзгі-қысқы кезеңде жамбылдықтар тұтынатын қатты отын көлемінің 38 пайызы.
– Осы жылыту маусымында халық тұтынатын 144,8 мың тонна көмірді 2025 жылдың сәуір айына дейін кезең-кезеңімен жеткізу жоспарланған. Облыста көмір сатумен 31 нарық субъектісі айналысады, олардың 25-і өңірлік операторлар. Қазіргі таңда көмір тұйықтарында 13 мың тонна көмір бар. Көмір тиелген жүк вагондары тұрақты келуде. Көмір тапшылығы жоқ, – дейді Ғалым Исабайұлы.
«ҚТЖ-Жүк тасымалы» ЖШС филиалы – Жамбыл ЖТ бөлімшесінің директоры Айдын Сеитбенбетов қазіргі уақытта бөлімшеге қарасты 11 станцияда 306 вагон, 83 837 тонна көмір бар екенін айтады. Тасымалданған қатты отынға тапсырыс берушілер – «Авангард Ко», «ТМЗ», «СК Еврадор» кәсіпорындары, «Иманалиев» және «Мұсатай», тағы да басқа жеке кәсіпкерліктерімен бірге Жамбыл жүк тасымалы, Жамбыл магистральдық желі бөлімшелеріне қарасты құрылымдар.
Жалпы облыста Шұбаркөл, Қаражыра маркалы көмірлердің бағасы сортына қарай 18-24 мың теңгені құрап отыр. «А» нүктесінен «Б» нүктесіне дейінгі, яғни ауылдарға дейінгі арақашықтығын ескерсек, жеткізу құны есебімен 21-27 мың теңгеге жетеді. Жамбыл облысының Байзақ, Жамбыл, Мойынқұм аудандарында көмір сатумен айналысатын теміржол тұйықтары бар, нарық субъектілері жоқ. Бұл өңірлердің тұрғындары көмірді Тараз және Шу қалаларынан сатып алады.