Қазақстан Вьетнамға бидайды тікелей контейнер ауыстырмай жеткізді
«Қазақстан темір жолы» ҰК» АҚ-ның еншілес компаниясы – «Кедентранссервис» АҚ 2025 жылғы мамырдан қыркүйекке дейін «Форт» ЖШС және жүк жөнелтуші «Продкорпорация» ҰК» АҚ-ның қатысуымен Қазақстанның солтүстік өңірлерінен 10 пойыз бидайды кешенді түрде тасымалдауды ұйымдастырды, деп хабарлайды Rail-news.kz.
Жеткізу бағыты – Ақкөл, Азат, Көкшетау станцияларынан Қытайдағы Ляньюньган порты арқылы Вьетнамның Хайфон портына дейін. Жалпы тасымал көлемі 17 000 тонна дәнді дақыл болды.
Жобаның негізгі ерекшелігі – ҚХР порттарында контейнерлерді ауыстырмай тасымалдаудың жүзеге асуы. Дәстүрлі тәжірибеде теміржол контейнерлері теңіз контейнерлеріне қайта тиеп салынады. Ал бұл жолы жүк жөнелту станциясынан соңғы портқа дейін бір контейнерде жеткізілді.
Мұндай тәсіл өнімнің сапасын жоғалтпай сақтауға, қайта тиеу операцияларын болдырмау арқылы жеткізу мерзімін қысқартуға және логистикалық шығындарды оңтайландыруға мүмкіндік берді.
Сонымен бірге бұл тасымал үлгісі қазіргі заманғы инфрақұрылымның тиімділігін және Қазақстанның Еуразиядағы маңызды көлік торабы ретіндегі әлеуетін дәлелдеді.
Компания атап өткендей, жобаның сәтті жүзеге асуы Оңтүстік-Шығыс Азияның қарқынды дамып келе жатқан нарықтарында отандық ауыл шаруашылығы тауар өндірушілеріне жаңа экспорттық мүмкіндіктер ашып отыр. Бұл өңірде дәнді дақылдарға деген сұраныс тұрақты түрде өсуде.