Оңтүстіктен батысқа 5 вагон шөп жөнелтілді

Қазір Маңғыстау өңірінде жем-шөп алтыннан да құнды дүние болып тұр. Құрғақшылықтың салдарынан талғажау етіп отырған бір-екі тұяқтың көтерем болып жатқанына құлазыған халыққа қандай көмек болса да артық емес. Сондықтан мал азығын жеткізу жайы түбекте басты мәселенің біріне айналған. Оған түбектік теміржолшылар да үлесін қосуда. Аймаққа өзге өңірлерден қолдау ретінде жіберіліп және кәсіпкерлер жеткізіп жатқан жем-шөптің теміржолмен жедел тасымалдануына атсалысуда. – Күні кеше еліміздің оңтүстігі- нен теміржолмен маңғыстаулық шаруаларға 5 вагон шөп жолға шықты. Оны Сарыағаштың азаматтары демеушілік көмек ретінде жіберіп отыр. Сол жүктің халыққа жылдам жетуі үшін біздің тарапымыздан да тиісті іс-шаралар жасақталуда. Бұл вагондар Маңғыстау, Өзен, Жетібай, Бейнеу, Шетпе станцияларына жеткізіледі. Қазір Шымкент пен Қызылорда облыстарында жүк пойыздарымен келе жатқан жүктің маршрутын қадағалап отырмыз, кідіріске жол бермеуге тырысудамыз, – деген Ақтөбе жүк тасымалы бөлімшесі Маңғыстау қосалқы бөлімшесі директоры- ның бірінші орынбасары Ерлан Бүркітов дәл қазір Маңғыстау, Бейнеу, Шетпе станцияларында жеке кәсіпкерлердің де 3 вагон кебек пен шөбі түсіріліп жатқанын айтады. Директор орынбасарының сөзі- не сүйенсек, бұдан басқа тағы да осындай 6 вагон жүк Маңғыстауға қарай бет алыпты. Оның бәрі, яғни мал азығы ретінде түбекке жіберілген жүктердің кідірістерге тап болмай, әдеттегі уақыттан тезірек жетуі түбек теміржолшыларының жіті назарында. Еске сала кетсек, теміржолдың мұндай қолдауының арқасында өткен айда да біраз вагон жем-шөп Маңғыстаудың станцияларына түсіріліп, шаруа қожалықтарына жол тартқан еді. Оның ішінде жеке кәсіпкерлерге, мекемелерге, жеке адамдарға келгеннен бөлек «Каспий» ӘКК» АҚ-ның «Азық-түлік Корпорация» АҚ-мен келісімшарты негізінде арзан бағамен жеткен он вагон арпа да болатын.