Қыс маусымына дайындық: 2602 ғимарат жөндеуден өтті
«Қазақстан темір жолшысы» газетінің тілшісі
«Қыс шанасын жаз сайлайтын» теміржолшылар биыл да қатал маусымға дайындықты шіліңгір шілдеде бастап, күзгі байқаумен қорытындылап отыр.
«Компанияда алдағы қыс маусымына дайындық маусым айының соңын ала басталды. 2022-2023 жылдардың қыс маусымына шаруашылықтар мен кадрларды дайындау бойынша іс-шаралар кешені әзірленіп, теміржол көлігі шаруашылықтарының нақты дайындығын тексеру үшін «ҚТЖ» ҰК» АҚ бірінші басшыларының төрағалығымен алты комиссия құрылды. Олар еліміздің барлық өңіріне барып, шаруашылықтарды тексерді, теміржолшылармен, жергілікті тұрғындармен кездесті», – дейді Магистральдық желі дирекциясының Инфрақұрылым қауіпсіздігі департаментінің директоры Серік Айқынбеков.
Оның айтуынша, шаруашылықтар мен кадрларды қысқы кезеңде жұмысқа дайындау жөніндегі іс-шаралар жоспарына сәйкес теміржол мекемелерін техникалық, ал қызметкерлер мен зейнеткерлерді тұрмыстық көмірмен қамтамасыз ету 100% жүзеге асырылған. Сонымен қатар ұзындығы 41,4 км жылу трассаларына ағымдық жөндеу жүргізіліп, 100 қазандық жабдығы дайындалған. Сондай-ақ, 2602 ғимарат ағымдық жөндеуден өткен. Сондай-ақ, 265 бірлік қар жинайтын және қар тазалайтын техникалардың бірқатарына қызмет мерзімін ұзартумен күрделі жөндеу жүргізіліп, енді біреулеріне деполық және күрделі жөндеу жұмыстары жасалған. Рельсте жүретін барлығы 193 бірлік көлік құралы дайындықтан өткен. Бүгінде жұмыскерлер қысқы арнайы және аяқ киіммен толық қамтамасыз етіліп, алғаш «қыстаушы» 2475 қызметкер дайындықтан өткен.
Бұл атқарылған жұмыстар теміржол инфрақұрылымының үздіксіз жұмысын қамтамасыз етумен қатар жолаушылар мен жүк пойыздарының қозғалыс қауіпсіздігіне де оң ықпалын тигізеді деген сенім бар.