Түбектің басты теміржол қақпасы жаңарады: құрылыс жұмыстары қарқын алды
Маңғыстау облысы бойынша меншікті тілші
Түбектің басты теміржол қақпасы Маңғыстау вокзалын жаңғырту жұмыстары биыл аяқталып, жыл соңына қарай пайдалануға беріледі.
Өткен жылы аймақта үш вокзалдың құрылыс-жөндеу жұмыстары басталған. Мұнайлы ауданында орналасқан, облыс орталығы мен аудандағы халыққа қызмет етіп тұрған Маңғыстау вокзалының реконструкциясы бүгінде қарқын алған. Қазір нысанда құрылыс жұмыстары жедел жүріп жатыр. Бұл туралы Қоғамдық коммуникация орталығында өткен брифингте аудан әкімі Қанат Құлжанов айтып, жұмыстың бүгінгі барысы туралы мағлұмат берді.
– Бүгінде вокзалдың негізгі ғимаратында металл конструкцияларынан қаңқа орнату жұмыстары жүріп жатыр. Құрылыс алаңында 54 жұмысшы мен 3 техника жұмылдырылған. Жұмыстың өнімділігін арттыру үшін нысанда қосымша жұмыс ауысымы енгізілген. Құрылыс-монтаждау жұмыстарын 2026 жылдың соңына дейін аяқтау жоспарланып отыр, – деді Қанат Құлжанов.
Бұл жаңалықты естіген халық әкімдіктің ресми парақшасына осы тақырыпқа қатысты көкейдегі сұрақтарын жолдады. Бірі Маңғыстау станциясындағы теміржол өткелі мен вокзал алдына жерүсті өткелін салу жөнінде ұсыныс білдірсе, енді бірі Маңғыстау станциясындағы теміржол өткеліндегі көлік кептелісін азайту үшін өткелді кеңейту керектігін айтты. Сұрақтар өз жөнімен жауабын тапты. Аталған өткелдегі көлік кептелісін жою мәселесі аудан әкімдігінің жұмыс жоспарында бар көрінеді. Осы өткел байланыстыратын «Маңғыстау-Қызылтөбе» бағытындағы автокөлік жолын қайта жөндеу жобасы дайындалып, мемлекеттік сараптамадан оң қорытындысы алынған. Жоба 2025-2027 жылдарға арналған инвестициялық жоспарға енгізілген. Демек, теміржол өткеліндегі көлік кептелісі азаятын күн де алыс емес секілді.