Пойыз құрастырушыдан – станция бастығына дейін

Сұхбат
31.08.2019, 16:53
Қосұйым Мұқашев

Атырау облысы бойынша меншікті тілші

Темір жол көлігіне бүкіл өмірін арнап, саланың өркендеуіне қомақты үлесін қосып жүрген азаматтар мұнайлы өңірде аз емес. Солардың бірі – Атырау станциясының бастығы Алтай Көбегенов. Еліміздегі мұнай тасымалының басым бөлігін қамтамасыз етіп отырған станция жұмысына басшылық жасап отырған теміржолшының портреті ҚТЖ бас ғимаратындағы Құрмет тақтасында ілулі тұр.

– Алтай Азанқұлұлы, сіздің пойыз құрастырушыдан бастап бөлімше басшылығына дейін өскен еңбек жолыңыз жас теміржолшыларға тұтас бір өмір мектебі болмақ. Әрине, бұл биікті бағындыру оңай болмағаны сізге ғана аян.

– Рахмет, әрине, бірақ менің өмір жолым өзім секілді жүздеген замандастарымның өмірбаянына өте ұқсас, артық ештеңесі жоқ дер едім. Теміржолда жұмысты ең төменгі қара жұмыстан бастап сатылап көтерілу дәстүрі – атам заманнан қалыптасқан дәстүр. Мен мектептен соң біраз уақыт Ақтөбе темір жол бөлімшесіне қарасты №142 бекетте кезекші болып жұмыс жасадым. Сосын Алматы теміржол көлігі инженерлері институтына «Темір жол көлігін ұйымдастыру және басқару» мамандығы бойынша оқуға түстім. Өзім теміржолшылар отбасынан шыққанмын, теміржолда жұмыс жасап, ненің не екенін түсініп қалғандықтан оқу да маған аса қиын болған жоқ, диплом алып, жолдамамен Атырауға келдім. Атақты династияны жалғастырушы жоғары білімді маған берген жұмыстары пойыз құрастырушының көмекшісі болды. Оған арланған да, қорланған да жоқпын, себебі ол кездегі тәртіп сондай, Құлсары станциясында еңбек еттім. Пойыз құрастырушы бола жүріп, дөңес кезекшілігіне ауыстым. Бұл екі жұмыс та оңай емес, бірі вагондарды сұрыптап, әр вагонның басына бір шауып жүрсең, бірінде дөңестен ылдилаған вагондарды жіті қадағалап отыру керек, мүлт кетуге болмайды, қырағылық қажет. Үнемі мұқият болуды дағдыға айналдырдым. Содан маневр, пойыз диспетчері, бас инженер, Мақатта станция бастығы лауазымдарын атқардым. Сол жылдарда мол тәжірибе жинақтап, кәсіби маман дәрежесіне жеттік.

– Атырау жол бөлімшесі бастығының бірінші орынбасары қызметін абыроймен атқарып, өмір бойына жинаған тәжірибеңізді басшылық лауазымда тиімді пайдалана білгендігіңізден хабардармыз.

– 2010-2014 жылдары төрт жылдай Атырау жол бөлімшесі бастығының бірінші орынбасары болып қызмет атқардым. Мақат ауданы мәслихатының депутаты болып, ауданның күрмеулі деген әлеуметтікэкономикалық мәселелерін шешуде де атсалысқан кездер болды сол жылдары. Сосын қозғалысы көп, жұмысы күрделі Атырау станциясының бастығы болып тағайындалдым. Оған да, міне, бірнеше жылдың жүзі өтті...

– Бүгінде Атырау станциясының мүмкіндігі, жұмыс ауқымы қаншалықты өсті?

– Бұл күндері Атырау станциясында вагондардың жөнелтілуі 5 бағытта жұмыс жасайды. Ақсарай түйіспесіне – үш бөліктен тұратын вагондар (жоғары Басқұншақ, Астрахань, Грузия, Әзербайжан республикалары жолдарына), Мақат бағытында (Орта Азия, Маңғышлақ түбегіне, Қандыағашқа), Ақжайық және Теңдік станцияларына республикаға маңызы бар Атырау мұнай өңдеу зауытына бос және жүк тиелген вагондар сұрыпталып жеткізіледі. Махамбет станциясына – «Ақтөбемұнайгаз», «Қазмұнайгазсауда», «Батыс Риал Сервис» компанияларының атына Оңтүстік, Батыс аймақтарынан шикі мұнай өнімдерімен келген вагондарды сұрыптап, уақытында дайындап жеткізіледі. Мұнайлы өңірдің маңызын арттырған темір жол аймақты ілгері сүйреп, ондағы барлық кәсіпорындармен қоян-қолтық еңбек етуде. Станцияда ұзындығы 1250 метр болатын 9 қабылдапжөнелту жолы, 6 сұрыптау жолы, аз қуаттағы дөңес іске қосылды. №26, №27, №35 үш тартымдық жол бар. Станциядан жүк пойыздарымен қатар, жергілікті және халықаралық жолаушы пойыздары да өтеді. Жүк тасымалы бойынша станция жоспар межесінен шығып, тасымал тасқынын арттыруда.

– Ұжым туралы не айтасыз?

– Атырау станциясы – өлкедегі байырғы еңбек ұжымы, абыройлы да беделді ұжымның бірі. Бүгінде ұжым мүшелері біраз жаңарды, жастар көп. Солардың жас жігерімен станция алға жылжып келеді, бірақ аға буынның тәжірибесінен бас тартқан жеріміз жоқ, кешегі қиын-қыстау жылдары теміржолды тығырықтан алып шыққан аға буынның еңбегі біз үшін қашан да құнды.

– Сіздің осыдан он жыл бұрын «Құрметті теміржолшы» белгісімен, ал 2005 жылы «Адал еңбегі үшін» төсбелгісімен марапатталғаныңызды білеміз. Еңбегіңіз бағаланып жатыр, атақ, абыройыңыз да жеткілікті. Әйтсе де, өміріңізді теміржолға арнағаныңызға кейде өкінбейсіз бе?

– Жоқ, еш өкінбеймін. Әкем де, анам да 45 жыл теміржолда жұмыс жасап, зейнеткерлікке шыққан жандар. Мен сол ізді жалғастырушымын. Заңды. Егер сіз теміржолшылар әулетінен шықсаңыз басқалай болуы мүмкін емес екенін түсінесіз. Менің де отбасымда екі ұл, бір қызым бар. Кенже ұлым бүгінде Махамбет станциясында пойыз құрастырушы болып еңбек етуде. Ол – менің ізбасарым. Біздің әулет үшін теміржол – өмір жолымыз.

– Әңгімеңізге рахмет!

Аймақтар
17.02.2025
Студенттер теміржолшы мамандығымен етене танысты
ҚТЖ келбеті
17.02.2025
Пойыз құрастырушының бір күні
Аймақтар
17.02.2025
Браконьерлікке тосқауыл қойылуда
Жолаушылар тасымалы
17.02.2025
ҚТЖ пойыз қозғалысының кестесін онлайн бақылайтын қызметті іске қосты
ҚТЖ келбеті
15.02.2025
Он сегізде от кешкен...
Жаңалықтар
14.02.2025
Ақтауда қызметкерлердің әл-ауқатын арттыру және еңбек жағдайларын жақсарту мәселесі қаралды
Жаңалықтар
14.02.2025
Астанада өткен фестивальде теміржол мамандығы жастарды қызықтырды
Қауіпсіздік
14.02.2025
Өткелде әйел мерт болды
Аймақтар
14.02.2025
Үздіктер қатарында
Жаңалықтар / Мұрағат
14.02.2025
Қазақстан теміржолшысы газеті, №11 14 ақпан 2025 жыл
Жаңалықтар
13.02.2025
ЭКСПО орталығында «Жұмысшы мамандықтар қаласы» фестивалі өтуде
Қауіпсіздік
13.02.2025
Профилактиканың пайдасы зор
Жаңалықтар
13.02.2025
Тіл секторының жұмысы қорытындыланды
Инфрақұрылым
13.02.2025
Семей теміржолында инфрақұрылым жаңаруда
Аймақтар
13.02.2025
Ғасырдан астам уақыт жұмыс істеп келе жатқан депо
Жаңалықтар
12.02.2025
ҚТЖ Пәкістанның көлік-логистикалық компанияларымен ынтымақтастықты нығайтады
Әлемде
12.02.2025
ҚХР-дан Ауғанстанға шыққан пойыз Қазақстан арқылы барады
Аймақтар
12.02.2025
Жұмыс сапасы балдық жүйемен бағаланады
Жаңалықтар
12.02.2025
Қазақстан мен Болгария Транскаспий дәлізі бойынша ынтымақтастықты дамытуда
Жаңалықтар
12.02.2025
Пойызда мас жолаушы полицейлерге қарсылық танытты