«Huawei» компаниясымен келісім жасалды
«Қазақстан темір жолшысы» газетінің тілшісі
Үстіміздегі жылдың 14 қыркүйегінде Қытай Халық Республикасының Төрағасы Си Цзинпиннің Қазақстанға сапары – екі ел ынтымақтастығының ерекше стратегиялық мәртебесі мен келешегінің тағы бір жарқын көрінісі болды. Қазақ-қытай қатынастарының қазіргі көлік-логистика саласындағы жоғары деңгейі, көршілес елдердің ірі корпорациялары арасындағы өзара іс-қимылды тереңдету үшін қажетті алғышарт болып отыр.
«Қазақстан темір жолы» ҰК» АҚ мен «Huawei Technologies Kazakhstan» ЖШС ақпараттық және телекоммуникациялық инфрақұрылымды дамыту, үлкен деректер, интернет дүниелері және жасанды интеллект сияқты инновациялық технологияларды әзірлеудегі бірлескен жұмысты ілгерілету мақсатында өзара іс-қимылды көздейтін Стратегиялық ынтымақтастық туралы келісімге қол қойды. Ұзақмерзімді стратегиялық келісім нәтижелеріне таяудағы бес жылда қол жеткізу жоспарланып отыр.
«Қазақстан темір жолы» ҰК» АҚ қозғалыс қауіпсіздігі деңгейіне, тасымалдау кезінде ұсынылатын қызметтер сапасына, транзиттен өту режиміне және теміржол тасымалы жүйелерінің біріктірілген жұмысына әсер ететін озық цифрлық технологияларды енгізу мен дамытуға ерекше назар аударып келеді.
«ҚТЖ» ҰК» АҚ алға тартқан деректерге сүйенсек, компаниялар арасындағы ынтымақтастық әлеуеті технологиялық процестің үздіксіз жұмысын қамтамасыз ете отырып, Қазақстан темір жолдарында заманауи инновациялық технологияларды бейімдеуге, сондай-ақ қызметтер сапасының ең жоғары стандарттарын қолдауға мүмкіндік береді.
«ҚТЖ» ҰК» АҚ Басқарма төрағасының Стратегия және цифрландыру жөніндегі орынбасары Әнуар Ахметжановтың айтуынша, деректерді беру желісін жаңғырту және озық технологияларды қолдану есебінен қозғалыс қауіпсіздігінің деңгейін, тасымалдау процесінің тиімділігін және еңбек өнімділігін айтарлықтай арттыруға мүмкіндік тумақ. ҚТЖ мен Huawei қол жеткізілген уағдаластықтарды жүзеге асыру үшін қазақстандық компаниялармен ақпараттық-коммуникациялық технологиялар саласында белсенді ынтымақтасуды жоспарлап отыр. Алдағы уақытта енгізілетін озық технологияларды тиімді пайдалануды қамтамасыз етуге ниетті.
– Теміржолдың жұмыс процестеріне коммуникациялық технологияларды интеграциялау өндірістік мүмкіндіктерді сапалы жақсартуға, клиентке бағдарлануды арттыруға және барынша пайдалану тиімділігін қамтамасыз етуге мүмкіндік береді, – деп атап өтті Huawei Technologies Kazakhstan Бас директоры Макс Чжао Сюй.
Оның айтуынша, Huawei компаниясы ҚТЖ-ның цифрлық трансформациясын қолдауға қашан да дайын.
«Қазақстан темір жолында цифрлық трансформациялауды жүзеге асыруға қолұшын созуға дайынбыз. Біз осы бағытта, заманауи бейімділіктегі және икемділіктегі зияткерлік жоғары технологиялық шешімдерді ұсынамыз. Бұл шешімдер қауіпсіз, ақылды және тиімді теміржол көлігі жүйелерін құру үшін бұлтты қызметтер мен байланыс қызметтерін ұсынады», – деді ол.