ҚТЖ дарынды жастарды баулуға ынталы

Қазақстан теміржолындағы дарынды, қабілетті жастарды дамытуға арналған «ҚТЖ-100 жас есім» бағдарламасы бойынша биылғы оқытудың соңғы кезеңі болып өтті, деп хабарлайды Rail-news.kz. 

Компанияның әлеуметтік саясат департаменті биыл аталған жобаға қатысушыларды бағдарлама аясында үш күн онлайн түрде оқытты. 2022 жылғы «Жақсы өзгерістер енгіз!» бағдарламасының негізгі бағдары – «Жобалық басқару, үнемді өндіріс мәдениеті» болып саналады. 

Бағдарлама аясында оқытудың бірінші күнінде «Жинаған білім мен тәжірибенің ретроспективасы» деген тақырыпта онлайн сессия өткізілді. Оның мақсаты – мақсаттар мен міндеттерге жету үшін ұдайы жетілу, тұрақты даму саласында, жобаларды басқаруда білімін қолдана отырып, осы жылы ұқыпты өндіріс аспаптарын үдеріске бейімдеу үшін жастардың біліктілігін қалыптастыру. Қалған екі күндегі онлайн сессиялар тақырыбы – «LEAN Management. Үнемшіл ұйым құру» деп аталды. Оқу бағдарламасына компанияның 16 бөлімшесі мен филиалдары және еншілес ұйымдарынан 85 жас қызметкер қатысуда. 

Жоба қатысушыларының бірі, Атбасар станциясындағы белгі беру және байланыс дистанциясының диспетчері Әсем Құласбаеваның айтуынша, ол «ҚТЖ-100 жас есім» бағдарламасы арқылы өз өмірінде орасан зор мүмкіндіктерге жол ашқан. 

Ақтөбе ЖТ бөлімшесінің өндірістік бөлім бастығы Темірхан Аманқұлов «ҚТЖ-100 жас есім» аясында өткізіліп жатқан іс-шаралар темір жолды әрі қарай дамытуға ықпал етеріне сенімді. 

«Жалпы Қазақстан темір жолының жастар саясаты жастарға деген ұмтылыс, алға деген көзқарасты дамыту және жастарды жан-жақты қолдау жағынан өте тиімді. Соның ішінде осы жобаны ерекше атауға болады. Бағдарлама жас теміржолшылардың темір жол саласын дамытуға деген ұмтылысын айқындай түседі», – дейді ол. 

Оқыту барысында ZOOM платформасында қатысушылар 8 адамнан онлайн бөлмелерге бөлінген. Топтарға ортақ тақырыптар берілген. Жеке бас қасиеттеріне байланысты ортақ қасиеттер туралы ой толғамдарын ортаға салған қатысушылар арасынан белсенділері елордада офлайн түрде өтетін оқытуға шақырылмақ.