ҚТЖ вагондарды беру-жинау кезінде сыбайлас жемқорлық тәуекелдерін жояды
«KTZ Cargo» және «Жүк тасымалдау процестерін басқару/TMS» автоматтандырылған жүйелері «Қазақстан темір жолы» ҰК» АҚ-ға кірме жолдарға вагондарды беру және жинау бойынша қызметтер көрсету кезінде сыбайлас жемқорлық тәуекелдерін азайту үшін енгізіледі.
Жобалар ҚТЖ-ның 2022-2026 жылдарға арналған ақпараттық технологияларды дамыту стратегиясына енгізілген. Жаңашылдықтар теміржолшылардың клиенттермен жеке байланысын болдырмай, маневрлік жұмыс процесінің ашықтығын қамтамасыз етеді. Бұл туралы «Қазақстан темір жолы» ҰК» АҚ-ның өндірістік процестер жөніндегі басқарушы директоры Бауыржан Орынбасаров Сыбайлас жемқорлыққа қарсы іс-қимыл агенттігінде өткен кеңесте айтты. Кездесу жүк теміржол қозғалысындағы сыбайлас жемқорлыққа ықпал ететін себептер мен жағдайларды жою бойынша қабылданып жатқан шараларға арналды. Қазіргі уақытта Ұлттық компанияда сыбайлас жемқорлық тәуекелдеріне сыртқы талдау жүргізіліп жатқаны атап өтілді. Автоматтандырылған жүйелер вагондарды беру-жинау процесін әділ де ашық етеді, вагондарды тиеуге беру және коммерциялық тексеру кезектілігін реттейді. Құжаттарды қағаз тасығышта тауар кассасына беру толығымен алынып тасталады. Коммерциялық бұзушылықтарды тіркеу үшін қабылдаптапсырушылардың мобильді жұмыс орындары жасалады. Ақпараттық жүйелердегі пайдаланушылардың барлық әрекеттеріне логин қойлады. Жүйелер деректерді қолмен түзетуден қорғалатын болады.