Қазақстан бидайы қытайдың Сиань қаласына жөнелтілді
6 қыркүйекте 1300 тонна бидай тиелген пойыз Октябрь станциясынан (Тайынша ауданы) Сиань қаласына жөнелтілді, деп хабарлайды Rail-news.kz.
Жаңа маршрутты контейнерлік пойыздың ұйымдастырушысы «Кедентранссервис» АҚ («ҚТЖ» ҰК» АҚ еншілес ұйымы) және Сиань қаласының халықаралық құрғақ порты – «Қытай-Қазақстан Сауда-логистикалық компаниясы» ЖШҚ бірлескен кәсіпорны.
Солтүстік Қазақстан бидай және ұнтақ өнімдерін өндіру бойынша көшбасшы, сондай-ақ елдегі астықтың ірі экспорттаушысы. 2022 жылдың қыркүйегінен 2023 жылдың маусымына дейін ҚХР-ға астықтың экспорттық тасымалы 4 есеге ұлғайып, 1,1 млн тоннаға жетті.
«Қытай-Қазақстан сауда-логистикалық компаниясы» ЖШҚ-ның астықпен алғашқы контейнерлік пойызды іске қосумен белсенді қатысуы екі елдің аграрлық және сауда-көлік секторларындағы ынтымақтастықты кеңейтуге қосымша серпін береді және болашақта Сиань қаласында бірлескен кәсіпорын тұрғызатын жүк терминалының қуатын пайдалануға мүмкіндік береді.
Кәсіпорын сондай-ақ Қазақстанның басқа өңірлері есебінен жөнелту географиясын кеңейтуді және тасымалданатын жүктердің номенклатурасын кеңейте отырып, ҚХР-дан сұранысқа ие импортпен пойыздарды кері жүктеуді жүзеге асыруды жоспарлап отыр.