Теміржолшылар «Қазақтың Ахаңы» атты бейнеролик түсірді

«ҚТЖ» ҰК» АҚ Көпфукционалды қызмет көрсету орталығы Ақтөбе өңірлік филиалының қызметкерлері «Киноклуб» челленджі аясында «Қазақтың Ахаңы» атты бейнеролик түсірді.  

Ролик ұлт ұстазы атанған қазақтың біртуар ұлы Ахмет Байтұрсынұлына арналды. 3 минуттық шағын ролик кинохикая ретінде түсірілген. Онда Ахмет Байтұрсынұлының басынан кешкен қиын-қыстау тағдыры баяндала отырып, ұлт мұраты жолында жасаған дамылсыз әрекеті насихатталады. Бір айта кетерлігі, роликте қазақтың белгілі тұлғаларының рөлін қарапайым теміржолшылар, филиал қызметкерлері сомдайды және өнерлері кәнігі актерлерден кем түспейді. Филиалдың есеп беру тобының бөлім басшысы, цехтық кәсіподақ комиссияның төрағасы Ардақ Ниязалина осы роликті түсіруге мұрындық болып, қолдау білдірген. Рөлдерді, яғни Ахмет Байтұрсынұлын – Бақдәулет Түнғатаров, Міржақып Дулатовты – Дулат Жаңбырбаев, Әлихан Бөкейхановты – Данияр Бажиков, Ахметтің жарын – Ольга Кошельник, Мұхамедияр Тунганшинды, әрі дикторды Дастан Жұмабай сомдаған. Өзге де қосалқы рөлдерде Азамат Оралбаев, Серік Байтүгелұлы, Зият Нұрлыбек сынды теміржолшылар ойнаған. Сценарийге Қазақстанда Ахмет Байтұрсынұлы туралы тұңғыш түсірілген сериал – «Ахмет. Ұлт ұстазы» кинохикаясының 1,2,3 бөлімінен алынған үзінділер пайдаланылған. Бұл бөлімдерде Алаш қайраткерінің ең алғаш әліппені жазу үстіндегі жарымен әңгімесі, ұлт зиялылары бірігіп қазақты «киргиз» атауынан құтылу үшін газеттің атын «Қазақ» деп қоюын ақылдасқан сәттері суреттеледі.  

Жалпы Көпфункционалды қызмет көрсету орталығының барлық филиалдары компанияда жүзеге асырылып жатқан «Ұлттық сезім» жобасын қолдап, ҚТЖ бойынша әр сәрсенбі күні ұлттық киім кию, ана тілін дәріптеуге қатысты түрлі челлендждерге белсене атсалысады. «Киноклуб» челленджі аясында әрбір сәрсенбіде теміржолылар қазақтың белгілі фильмдерін көріп, талқылайды.