Алматыда Түркі мемлекеттері ұйымы көлік министрлерінің VIII кездесуі өтті
Алматы қаласында өткен «New Silk Way» VII халықаралық көлік-логистикалық бизнес-форумы аясында Түркі мемлекеттері ұйымының (ТМҰ) көлік министрлерінің VIII кездесуі өтті, деп хабарлайды Rail-news.kz.
Іс-шараға ТМҰ Бас хатшысы, сондай-ақ Әзербайжан, Қазақстан, Қырғызстан, Түркия және Өзбекстан көлік ведомстволарының басшылары қатысты.
Кездесу барысында мемлекеттер арасындағы көлік саласындағы ынтымақтастықты дамыту мәселелері талқыланды. Жиын қорытындысы бойынша көлік саласындағы ынтымақтастықты одан әрі дамыту жөніндегі тараптардың келісімдерін қамтитын бірлескен коммюнике қабылданды.
Транскаспий халықаралық көлік бағытын дамытуға, көлік дәліздерін цифрландыруға және электрондық транзиттік рәсімдерді енгізуге ерекше назар аударылды. Теңіз тасымалын одан әрі дамыту үшін Каспий арқылы жүк ағындарын арттыру, жаңа жүк және контейнерлік терминалдар салу, паром қатынасын іске қосу бастамалары қолдау тапты. Бұл мақсатта ТМҰ елдерінің профильдік ведомстволарының қатысуымен сарапшылардың кездесуі өткізіледі.
Сондай-ақ, теміржол әкімшіліктерінің тұрақты блок-пойыздарды ұйымдастыру жөніндегі бірлескен жұмысы, соның ішінде Баку–Тбилиси–Карс бағытын пайдалану бойынша келісім расталды. Тараптар көлік рәсімдерін цифрландыруға уағдаласты. Атап айтқанда, e-Permit, e-TIR және e-CMR электрондық жүйелерін жедел енгізу бойынша келісімге қол жеткізілді. Мысалы, мемлекеттер арасындағы шетелдік рұқсат бланкілерімен алмасу процесі толықтай электрондық форматқа көшірілмек.
Қатысушылар қол жеткізілген уағдаластықтар өңірлік байланысты нығайтуға, сауданы дамытуға және мемлекеттер арасындағы экономикалық ынтымақтастықты күшейтуге жаңа мүмкіндіктер ашатынын атап өтті.
ТМҰ көлік министрлерінің келесі IX кездесуі 2026 жылы Қырғызстанда өтеді.