Теміржолшылар «Ұлттық диктант» жобасына қатысуда
«Қазақстан теміржолшысы» газетінің тілшісі
ҚТЖ қызметкерлері республикалық деңгейде өтіп жатқан «Ұлттық диктант» іс-шарасына белсенді атсалысуда. Жоба компанияның Орталық аппаратында бастау алып, оған 400-ден астам теміржол қызметкерлері қатысты. Теміржолшылар қазақ тілінде диктант жазып, білімі мен сауаттылығын сарапқа салды.
«Ұлттық диктант» іс-шарасын Халықаралық «Қазақ тілі» қоғамдық бірлестігі мен Ш.Шаяхметов атындағы «Тіл-Қазына» ұлттық ғылыми-практикалық орталығы бірлесе өткізуде. Жоба биыл 5 қыркүйек – Қазақстан халқының тілдері күні қарсаңында бастау алған болатын. Оның мақсаты – жазу мәдениетін жетілдіру, сауатты жазу дағдыларын қалыптастыру және тіл арқылы ұлттық бірегейлікті нығайту. Диктант офлайн және онлайн форматта өткізіліп, оған барлық азаматтар қатысуда. Онлайн диктантты www.til.kz сайтындағы арнайы парақшада кез келген уақытта орындауға мүмкіндік бар. Қатысушыларға электронды алғыс хатпен қатар KITAP платформасына тегін жазылуға мүмкіндік беріледі. Жоба нәтижелері жыл соңына дейін жарияланады. «Ұлттық диктант» дәстүрлі түрде жыл сайын өткізілмек.
– Мемлекеттік тіліміздің дамуы үшін маңызды осындай жобаны, республикалық мәдени-ағартушылық іс-шараны ҚТЖ компаниясының қолдап, оған бір адамдай жұмыла қатысып жатқанына қатты риза болып тұрмыз. Бұл сіздердің мемлекеттік тілге деген құрметіңізді көрсетеді. Хат жазып, ұсыныс білдіргенде сіздердің тарапыңыздан бірден қолдау тапты, сауатты жазу – тілге деген құрметтің ғана емес, әрбір адамның мәдениетінің белгісі, – деді ҚР Ғылым және жоғары білім министрлігі Тіл саясаты комитетінің басқарма басшысы Талғат Жакенов.
Диктантта А. Байтұрсыновтың «Қазақ» газетінде жазылған «Оқу жайы» атты мақаласы оқылды. Қатысушылардан тек жасы мен жынысы, қызметін ғана көрсету сұралды. Атыжөнін жазу міндеттелмеді. Диктантты жазып болған соң, оның дұрыс жазылған нұсқасы экранға шығарылып, қатысушылар қатемен өздері жұмыс істеді. Жалпы жоба соңында диктант жазу шамасына талдау жүргізіліп, халықтың сауатты жазу деңгейіне баға беріледі. ҚТЖ бойынша 8-9 қалада 3000- нан астам теміржолшы осы диктант жазуға қатысатын болады.