Ақтаулық студент WorldSkills Kazakhstan 2025 чемпионатында үздік шықты
Маңғыстау облысы бойынша меншікті тілші
Жұмысшы мамандықтар жылы аясында Астанада өткен WorldSkills Kazakhstan 2025 ұлттық чемпионатына қатысқан болашақ теміржолшы М.Тынышбаев атындағы Ақтау ALT көлік колледжінің студенті Бексұлтан Байдулла ІІ орынды алды.
Өз саласы бойынша елорда төрінде бақ сынаған ол Ақтау ALT көлік колледжінің «Локомотивті басқару» құзыреттілігі бағытында өзгелерден озық шығып, оқу ордасының атын төрге оздырды. Аймақтың абыройын асқақтатты.
– Бұл жетістік – шәкіртіміздің үздік дайындық деңгейінің, кәсіби шеберлігі мен талмай ізденуінің нәтижесі. Бексұлтан колледжіміздің мерейін арттырып, болашақ теміржол маманы ретінде өзінің жоғары әлеуетін дәлелдеді. Оның табысы – түбек теміржолшыларын даярлау «шеберханасына» айналған оқу ордамыздың және ондағы ұстаздарымыздың ерен еңбегі мен қолдауының, сондай-ақ өзінің талаптылығы, табандылығының жемісі, – дейді студенттің жетекшісі Жаухар Тоғызбаева.
Колледж басшылығы да Бексұлтанды жеңісімен құттықтап, алдағы уақытта да жаңа белестерді бағындырып, кәсіби жолында үлкен жетістіктерге жететініне сенім артты.