Талғат Алдыбергенов теміржолшыларды Тәуелсіздік күнімен құттықтады
«Қазақстан темір жолы» ҰК» АҚ Басқарма төрағасы Талғат Алдыбергенов теміржолшыларды Тәуелсіздік күнімен құттықтады, деп хабарлайды Rail-news.kz.
Құрметті сала ардагерлері және әріптестер!
Тәуелсіздік күніне орай ізгі құттықтауымды қабыл алыңыздар!
Бұл күн – еліміздің ұлттық мүдделерін қорғау мен ерлігіне тағзым етуді, кешегі күндер мен болашақ ұрпақтың ажырамас байланысын білдіретін мереке.
Экономикалық өсімдегі «Қазақстан темір жолы» ұлттық компаниясының рөлі ерекше екендігін айта кетпекпін. Тәуелсіздік алған уақыттан бері елімізде 2,5 мың шақырымға жуық жаңа теміржол салынды. Мемлекет басшысының тапсырмасы бойынша Магистральдық теміржол желісін дамытудың 2029 жылға дейінгі бағдарламасы іске асырылып жатқанын атап өтпекпін. Сондай-ақ 2030 жылға қарай Ұлттық тасымалдаушының жолаушылар вагондары паркін жаңарту 100% құрайды деп жоспарлануда. Бүкіл еліміз бойынша 124 вокзалды жаңғыртудың ауқымды бағдарламасы жүзеге асырылуда. Әрине, бұл ауқымды шаруалар сіздердің қажырлы еңбектеріңіздің арқасы деп білемін.
Бұл ретте қуатты әлеуетке ие егемен мемлекет құруда теміржолшылардың үлесі де орасан екенін атап өткім келеді. Күрделі міндеттерді шешу біздің қолымыздан келетінін уақыт айқын көрсетіп отыр. Алға ұмтылысымызды жалғастырып, жоспарларымызды сәтті орындайтынымызға сенімдімін.
Баршаңызға зор денсаулық, отбасыларыңызға татулық, жұмыстарыңызға табыс, ал елімізге өркендеу мен береке тілеймін!
«Қазақстан темір жолы» ҰК» АҚ Басқарма төрағасы Талғат Алдыбергенов