Huawei темір жол саласындағы цифрлық революцияны таныстырды
Шанхайда өткен «Huawei Connect 2025» жаһандық саммитінде технологиялық алпауыт теміржол көлігі мен логистиканың болашағына қатысты өз пайымын жариялады. Компанияның стратегиясы — жасанды интеллект (ЖИ) пен мультимодальды тасымалды ұштастыру арқылы жаңа буынның көлік жүйесін құру, деп хабарлайды Rail-news.kz.
Huawei өз табысының 20%-дан астамын ғылыми зерттеулерге (R&D) жұмсай отырып, теміржол саласындағы цифрлық негізді қалыптастыруда. Саммитте таныстырылған басты инновациялардың бірі — жүк вагондарының ақауларын анықтау жүйесі болды (TOU DETECSET).
Компьютерлік көру технологиясына негізделген бұл құрал Қытай теміржолдарында сынақтан өтіп, ақауларды 99,3% дәлдікпен анықтайтынын көрсеткен. Бұл техникалық тексеру уақытын қысқартып, адам факторына тәуелділікті азайтады. Мұндай технологиялар қазірдің өзінде Оңтүстік Африканың теміржол нысандарын қорғауда да қолданылып жатыр екен.
Huawei вице-президенті және «Ақылды көлік» бөлімшесінің бас директоры Ма Юэ мырзаның айтуынша, қазіргі уақытта теміржол саласының басымдығы мега-жобалар салудан гөрі, бар инфрақұрылымды пайдалану мен қызмет көрсету сапасын жақсартуға ауысып келеді.
«Теміржол — оқшауланған жүйе емес, ол кешенді көлік жүйесінің негізгі түйіні. Біз теміржолды автомобиль, әуе және су жолдарымен интеграциялау арқылы кеден мен порттарды байланыстыратын біртұтас, үзіліссіз логистикалық желі құрамыз», — деді Ма Юэ.
Huawei бүгінде әлем бойынша:
- 100-ден астам порт пен 200 логистикалық кәсіпорынға;
- 70-тен астам қаладағы 300-ден астам метро желісіне;
- 180 000 шақырымнан астам магистральдық теміржолға қызмет көрсетіп келеді.