ҚТЖ және РЖД: 2026 жылға арналған даму басымдықтары анықталды
Мәскеуге жұмыс сапары аясында «ҚТЖ» ҰК» АҚ Басқарма төрағасы Талғат Алдыбергеновтың «РЖД» ААҚ Бас директоры – басқарма төрағасы Олег Белозеровпен екіжақты кездесуі өтті. Тараптар 2025 жылдың қорытындысын шығарып, 2026 жылға арналған бірлескен іс-қимыл жоспарын келісті, деп хабарлайды Rail-news.kz.
2025 жылдың қорытындысы бойынша ҚР мен РФ арасындағы тасымалдау көлемі 3,5% ұлғайып, 92,1 млн тоннаға жетті (2024 жылғы деңгейге+3,1 млн тонна), экспорт: 52,9 млн тонна (+4,3%), транзит: 25,6 млн тонна (+8,8%).
Қазақстандық астықты РФ аумағы арқылы тасымалдау 2,2 млн тоннаны құрап, үш есе өсімді көрсетті. Бұл ретте Ресей порттары арқылы ауыстырып тиеу 34% (526,4 мың тоннаға дейін) өсті. ҚР-дан РФ порттары арқылы көмір тасымалдау көлемі 11,7 млн тоннаға жеткен өсу динамикасын (+38%) көрсетті.
2026 жылы тасымалдаудың әлеуетті көлемі мемлекетаралық түйісу пункттерінің (МАТП) жобалық өткізу қабілеттілігінен асып кетуі мүмкін екенін ескере отырып, тараптар теміржол инфрақұрылымын ілеспе дамытудың, МАТП-дағы мемлекеттік бақылаушы органдардың үйлестірілген жұмысының және пойыздар алмасу саны мен түйісу станцияларын технологиялық дамыту жөніндегі уағдаластықтарды сақтаудың маңыздылығын атап өтті.
«Солтүстік – Оңтүстік» халықаралық көлік дәлізінің (ХКД) шығыс тармағын дамыту талқыланды. 2025 жылдың қорытындысы бойынша дәліз бойынша контейнерлік тасымалдау 1,5 есе өсті.
Компания басшылары логистиканы цифрлық трансформациялау саласындағы табысты, атап айтқанда, халықаралық қатынаста электрондық жүкқұжаттарды пайдалануға көшуді атап көрсетті.