Пойызда тәртіп бұзған жолаушылар әкімшілік қамауға алынды
Көлік инфрақұрылымы нысандарында қоғамдық тәртіпті сақтау – құқық қорғау органдарының маңызды міндеттерінің бірі. Осы бағытта Көліктегі полиция департаменті жүйелі түрде жұмыс жүргізіп келеді. Негізгі мақсат – азаматтардың қауіпсіздігін қамтамасыз ету, олардың құқықтары мен заңды мүдделерін қорғау, сондай-ақ вокзалдар мен пойыздардағы тәртіпті бақылауда ұстау, деп хабарлайды Rail-news.kz.
Жыл басынан бері көліктегі полиция қызметкерлері 25 378 әкімшілік құқық бұзушылықты анықтаған. Талдап қарасаңыз, олардың басым бөлігі қоғамдық тәртіпке қатысты. Мәселен, қоғамдық орындарда алкогольдік ішімдіктерді ішудің 1 831 дерегі тіркелген. Бұдан бөлек, ұсақ бұзақылықтың 190 фактісі анықталған. Сондай-ақ полиция қызметкерлерінің заңды талаптарына бағынбаудың 22 жағдайы тіркелген. Бұл көрсеткіштер көлік нысандарында тәртіпті сақтау мәселесі әлі де өзекті екенін аңғартады.
Осындай жағдайлардың бірі «Орал – Астана» бағытындағы жолаушылар пойызында болды. Қостанай станциясындағы көліктегі полиция бөлімінің қызметкерлері пойызды патрульдеу кезінде 49 жастағы жолаушыны анықтады. Ол алкогольдік масаң күйде болған. Жолаушы вагон жолсерігі мен басқа адамдарға балағат сөздер айтып, қоғамдық тыныштықты бұзған. Бұған қоса, полиция қызметкерлерінің заңды талаптарын орындаудан бас тартқан.
Аталған азаматқа қатысты екі бап бойынша әкімшілік іс қозғалды. Яғни ұсақ бұзақылық және құқық қорғау органы қызметкерінің заңды талабына бағынбау фактілері бойынша жауапкершілік қаралды. Сот шешімімен оған 7 тәулік мерзімге әкімшілік қамауға алу жазасы тағайындалды.
Осыған ұқсас оқиға Ақтөбе станциясында да тіркелген. Онда 46 жастағы ер адам қоғамдық тәртіпті бұзып, полиция қызметкерлерінің талаптарын орындаудан бас тартқан. Нәтижесінде ол да әкімшілік жауапкершілікке тартылып, сот шешімімен 6 тәулікке қамауға алынған.
Мұндай жағдайлар кейде ұсақ көрінгенімен, қоғамдық ортадағы қауіпсіздікке әсер ететіні анық. Сондықтан көліктегі полиция қызметкерлері пойыздар мен вокзалдарда тәртіпті сақтау бағытындағы жұмысты жалғастырып келеді. Ал құқық қорғау органдары азаматтарды қоғамдық орындарда заң талаптарын сақтауға шақырады.