Жауапкершілік жүгі ауыр
«Қазақстан теміржолшысы» газетінің тілшісі
Теміржол саласында әртүрлі қызметтің тізгінін ұстаған маман иелерін көптеп кездестіруге болады. Алайда, оларды байланыстыратын ортақ нәрсе, ол қозғалыс қауіпсіздігін қамтамасыз ету. Ал пойыз диспетчері үшін бұл – үлкен жауапкершілік. Кейіпкеріміз Нұрбол Жекенов – осы жауапкершілік үдесінен табыла білген маман.
«ҚТЖ» ҰК» АҚ Тасымалдау процесі дирекциясының Тасымалды басқарудың өңірлік орталығы филиалына (РЦУП-3) жақында Алматыдағы орталықтан ауысып келген пойыз диспетчерін қызу жұмыс үстінде кездестірдік. Оның айналасына қарауға мұршасы жоқ. Рациямен әріптестеріне кезек-кезек шығып немесе қоңырауға жауап беріп жатқаны. Үстелінің үстіндегі пойыздардың орындалатын қозғалыс кестесі жазылған үлкен бланк қағаздан оның Көкшетаудан Петропавлға дейін және Көкшетаудан Қызылтуға дейінгі аралықтың қозғалыс қауіпсіздігіне жауапты екенін көрдік. Бұл аралықта ол 20 шақты станция мен бекеттің жолындағы қозғалысты бақылап отырады.
– Пойыз диспетчерінің жауапкершілік жүгі ауыр. Көрші телімдердегі диспетчерлермен тұрақты байланыста боламын. Қай бағыттан қандай пойыздар келе жатқанын қадағалаймын. Станциялардан пойыздардың орналасуы жөнінде мәлімет алып отырамын. Сұрыптау станцияларындағы вагондардың санын да бақылаймын. Әрбір жолдың өз бағытына сәйкес пойыздарды құрастырамын. Оларды дайын құрам ретінде белгілі бір бағыттарға жіберу үшін алдын ала жоспар жасаймын, – деді бізге бір сәт уақыт тауып сала маманы.
Абай облысындағы Аягөз қаласындағы мектеп-гимназияның 9-сыныбын бітірген бойда Алматы көлік және коммуникация колледжіне оқуға түіп, оны 2012 жылы аяқтап, еңбек жолын Жаңасемей станциясында бағыттама постының кезекшісі болып бастаған екен. Әрі қарай аға бағыттама пост кезекшісі, пойыз құрастырушы, дөңес кезекшісі, маневрлік диспетчер болып 2022 жылға дейін еңбек етті. Осындай мол тәжірибемен сол жылы Алматыда ашылған РЦУП-3-те пойыз диспетчері және бөлімше бойынша кезекші болып жұмыс істеді. Ал биыл Астанаға ауысыпты.
– Темір жол – күрделі жүйе. Ондағы әр адам – сол жүйенің маңызды бір тетігі. Әр тетіктің үйлесімді жұмысы жалпы қозғалыстың тұрақтылығын қамтамасыз етеді. Диспетчердің негізгі міндеті – осы процесті үйлестіру. Сондай-ақ тапсырмалардың уақытылы орындалуын қадағалау. Пойыздардың қозғалысын және жолдардың жүктемесін нақты бақылауда ұстау, – дейді теміржолшы.
Он төрт жылдық тәжірибесі бар теміржолшы көптеген марапаттарға ие болып, біліктілігін арттырғаны үшін сертификаттар алған. Ол өмірде кәсібін дұрыс таңдағанына дән риза.