Сенімді әлеуметтік серіктес

Жаңалықтар

13.04.2018, 11:10

«Қазақстан темір жолы» компаниясының сенімді әлеуметтік серіктесі. Бұл – «Қазақстандық салалық теміржол, автомобиль, әуе және су көлігі қызметкерлерінің кәсіби одағы» ҚБ қызметіне берілген баға. Ол туралы Астанада осы бірлестік ұйымдастырған «Ынтымақтастық. Ортақтастық. Жасампаздық» атты бастауыш кәсіподақ ұйымдары төрағаларының форумында айтылды. 300-ден астам кәсіподақ өкілдері мен ҚР Парламенті Мәжілісінің депутаттары, көршілес Қырғызстан, Өзбекстан, Тәжікстан елдерінің кәсіподақшылары, теміржолшылар қатысқан екі күндік форум мақсаты сала қызметкерлері арасында өзара байланысты дамытып, тәжірибе алмасу, олардың қызметін белсенді ету, болашақ жоспарларды талқылаумен қатар биылғы Елбасы Жолдауы мен 5 әлеуметтік бастамасын кеңінен насихаттап, түсіндіру болды. Форумды сөз сөйлеп ашқан ҚРКФ төрағасы Бақытжан Әбдірайым «Қазпрофтранс» ҚБ жұмысына жоғары баға берді. – Өз миссиясын белсенді атқарып отыр. Жұмыс берушінің сенімді әлеуметтік серіктесі. Жұмыс беруші қашан да алдымен кәсіподақ пікіріне құлақ түреді. Өйткені ол – жұмысшылармен арадағы, солардың барлық талап-тілектері мен мұң-мұқтажын жақсы білетін, екі арада дәнекерлік көпір орнатқан ұйым. Бұл міндетін «ҚТЖ» компаниясының кәсіподағы өте жоғары деңгейде орындап отыр, – деді ол өз сөзінде. Сонымен қатар ол Елбасы Жолдауы мен оның бастамаларындағы тапсырмаларды орындау үшін бірлесе атқаратын жұмыстар туралы атап өтті. Әсіресе Президенттің еңбек қатынастарына, еңбек адамдарының құқықтары мен мүдделеріне қатысты кәсіподақтарға жүктелген жауапкершілік, осы саладағы түйінді мәселелер туралы да баяндады. Өйткені жаһандану кезеңінде әлеуметтік-экономикалық мәселелер мен еңбек қатынастарын реттеуге атсалысу, сол арқылы капиталды дамыту – кәсіподақтар алдындағы зор міндет. Ол сондай-ақ барлық бастауыш кәсіподақ ұйымдарының бірлікте еңбек етіп, олардың қызметін жаңа белеске көтеру жайын қозғады. Ал «ҚТЖ» ҰК» АҚ вице-президенті Ерік Имашев ұлттық компания кәсіподағы елдегі ең ірі кәсіподақ ұйымы екенін атап айтты. – Көліктік-логистикалық холдинг болып танылатын ұлттық компаниямыз жұмысшыларымыздың құқықтары мен мүдделерін қорғап, қолайлы еңбек жағдайын жасауға белсенді атсалысып отырған «Қазпрофтранс» ҚБ жұмысы мен бастамаларын қашан да толығымен қолдайды. «Қазақстан темір жолы» компаниясы қызметкерлері өз кәсіподақтарының мықты әрі сенімді екенін жақсы біледі. Біздегі барлық әлеуметтік мәселелер кәсіподақпен бірлесе шешіледі. Өйткені бәріміз де кез келген компанияның әлеуметтік еңбек жағдайы, қызметкерлерінің мүдделік мәселелері оңтайлы шешілсе ғана, компания қызметінің де алға басатынын жақсы білеміз. Ол табысты даму кепілі болып табылады. Сондықтан бүгінгі форум осы саладағы кездесіп жатқан мәселелерді талқылап, шешуде ең бір бірегей сұхбат, пікірталас алаңы болары сөзсіз, – деді өз сөзінде компания вице-президенті. Ал «Қазпрофтранс» ҚБ жұмысы мен жоспарлары туралы егжей-тегжейлі оның төрағасы Оразғали Ахметбаев баяндап берді. – Салалық кәсіподақ бастауыш кәсіподақ ұйымдарының жұмысына ерекше назар аударады. Біздің салалық кәсіподақтың құрылымы 13 филиалдан, 141 бастауыш ұйымнан және жергілікті кәсіподақтар мүшесінен тұрады. Салалық кәсіподақтар құрамында жүз мыңнан аса кәсіподақ мүшесі бар. Оның 93 пайызы – теміржолшылар, – деді төраға. Жиынның ресми бөлімі жабылған соң форум қатысушыларының ұлттық компанияның құрылымдық бөлімшелерінің бірінші басшыларымен кездесулері өтті. Форумның екінші күнінде халықаралық сарапшылар, ҚР КФ қызметкерлері тыңдалып, кәсіподақтың Орталық кеңесі аппаратының басшылығымен және мамандарымен кездесу өткізілді.

Сенімді әлеуметтік серіктес

Басқа да жаңалықтар