Жылқылар бірнеше рет жүк пойызын тоқтатты

Темір жолдың үстіне шығып кетіп, қозғалысқа қауіп төндіретін төрт түлік теміржолшылар үшін ең үлкен «жау» болып отырғаны белгілі. Жуырда Жамбыл жүк тасымалы бөлімшесіне қарасты жолдарда жол бойына шыққан жылқылар бірнеше рет жүк пойызын тоқтатқан.

Теміржолшылар жергілікті желілік полиция бөліміне шағымданған. Ал Шығанақ станциясы желілік полиция бөлімшесінің бастығы полиция аға лейтенанты А.Анарбаевтың сөзіне қарағанда, мұндай олқылықтар қазіргі таңда ауылдық округтердегі иесіз жүрген малдарды қамап, иелеріне айыппұл салыну арқылы ғана қадағалануда.

Заңдық тұрғыда одан әрі шара қолдана алмайтын көрінеді.

«Кейбір тұрғындар бақташыға бергілері келмеген қаражатын айыппұл төлеп екі еселеніп шығындануда. Осы күнге дейін 12 ауылда осындай оқиғаларға байланысты хаттамалар толтырылып, ескертулер айтылды. Мал иелеріне 13 890 теңге көлемінде айыппұл салынды», – дейді бөлімше бастығы.

Иесіз қалған мал теміржол қозғалысының жұмысына кедергі келтіруде. Сол себепті, сала мамандары ауыл тұрғындарына малдарын қараусыз қалдырмауларын сұрап, ауыл-ауылды аралап, үгіт-насихат жұмыстарын күшейтуде.