Жағдай толық бақылауда

Елімізде коронавирус індетіне байланысты төтенше жағдай жарияланса да Түлкібас станциясы күнделікті жұмысын кестеге сай жалғастыруда. Айта кетейік, Түркістан облысында карантин жарияланған жоқ, тек індет шыққан елді мекендер мен аудандар ғана қатаң қоршауға алынып, шектеулер енгізілді.

 Бір қуанарлығы, Түлкібас бұл індеттен аман. Дегенмен, «сақтықта қорлық жоқ» деген қағиданы ұстанған станция басшысы Нематилла Тойчибаев санитарлықэпидемиялық дезинфекция жұмыстарына аса қатты мән беріп, ара қашықтықты сақтау, бетперде тағып қолғап кию, қол беріп амандаспау сынды шектеулерді енгізіп отыр.

Табиғаты көркем тау шатқалында орналасқан Түлкібас ауданындағы станцияда 12 жол бар. Ұжымда түрлі ұлт өкілдерінен құралған 44 теміржолшы еңбек етеді. Станциядан тиелетін негізгі жүк түрлері ұн мен бидай, әктастар. Себебі, ауданда ұн мен әк шығаратын екі зауыт жұмыс істейді.

Биыл Түлкібас станциясынан бірінші тоқсанда тиелген жүк түрлеріне тоқтала кетсек, жылжымалы құраммен 93 вагон ұн, 100 вагон әктас, жалпы екеуін қосқанда 193 вагон, 12362 мың тонна жүк тиелген. Сол бірінші тоқсанда 13 вагон бидай, 51 жабық вагонмен кебек, 2 вагон пиломатериалдар, 6 вагон құбыр, 17 жабық вагонмен полиэтилен түйіршіктері түсірілген. Қысқасы, 89 вагон жүк түсіріліп, салмағы 4960 тоннаны құраған.

Бүгінгі төтенше жағдай барысында станцияда қауіпсіздік шаралары толық сақталған, теміржолшылардың барлығы да қажетті киім-кешекпен, бетпердемен, сүт өнімдерімен қамтамасыз етілген. Жыл басынан бері теміржол бойында ешқандай да мал қағу, адам басу фактілері мен апатты жағдайлар орын алмаған. Жұмысшылардың барлығы маска тағып, антисептик заттарын тұрақты қолдануын станция бастығы жеке бақылауында ұстап отыр.