Түбек теміржолын түлеткен тұлға

Жыл басында атауы өзгерген «ҚТЖ-Жүк тасымалы» ЖШС Маңғыстау филиалы жаңа жылды жаңалықпен бастады. Маңғыстау жүк тасымалы бөлімшесін ұзақ жыл басқарған Нәжімеден Ғұбашов құрметті зейнет демалысына шықты.

Маңғыстау бөлімшесінің тарихында алғашқы «НОД» болып қалған Нәжімеден Бақтығалиұлын құрметті демалысқа шығарып салуға Астанадан арнайы келген қонақтар қатарында Компания басқармасы төрағасының орынбасары Марат Шакенов, «ҚТЖ-Жүк тасымалы» ЖШС бас директоры Асан Үмбетов, тағы басқа азаматтар Н. Ғұбашов еңбек еткен жылдардағы түбек теміржолындағы жетістіктерді тілге тиек етіп, өңірдегі жүк тасымалы жұмысын үйлестіріп, саланың дамуына қосқан жеке үлесі үшін алғыс айтты. Компания бастығының құттықтауын жеткізіп, сый-сияпаттарын табыс етті.  

Айта кету керек, Нәжімеден Бақтығалиұлы бөлімшені басқарған жылдары түбек темір жолында елеулі өзгерістер орын алғаны шындық. Маңғыстау теміржолы транзиттік жүктерді тасымалдауда маңызды нүктеде орналасқандықтан Оазис арқылы Өзбекстанмен, Болашақ станциясы арқылы Түркіменстанмен, Құрық және Ақтау теңіз порттары арқылы Каспий маңы елдері, Еуропамен жүк тасымалын жүзеге асыруда мүмкіндігі мол. Осы мүмкіндіктердің ашылуына атсалысып, оны орынды пайдалануды үйлестіре алған бөлімше басшысы түбектегі жүк тасымалының жылдан жылға артып, көрсеткіштердің ұлғаюына, жаңа ірі жобалардың сәтті жүзеге асуына бар күш-жігерін жұмсады.  

Салтанатты кеште сөз алған әріптестер 2007 жылы алғаш құрылған Маңғыстау бөлімшесінің директоры болып тағайындалғаннан бастап теміржол телімінің өткізу қабілетін жоғарылату, жаңа техниканы енгізу және оның негізінде жұмыс технологиясын жетілдіру, тасылатын жүктер мен қозғалмалы құрамның сақталуы мен пойыздар қозғалысының қауіпсіздігін арттыру, еңбек өнімділігін көтеру жұмыстарын біліктілікпен ұйымдастырған Нәжімеден Бақтығалиұлының ерен еңбегіне ерекше тоқталды.  

Н.Ғұбашовтың түбек темір жолын ондаған жылдар бойы абыроймен басқарған қызметі орынды бағаланып, мемлекеттік «Құрмет» орденімен, салалық «Құрметті теміржолшы» белгісімен, «Ерен еңбегі үшін» медалімен, ҚР Президентінің Алғыс хатымен, ҚТЖ басшылығының Алғыс хатымен және Құрмет грамотасымен марапатталды. Облыстық мәслихат депутаты болып, қоғамдық жұмыстарды да қатар алып жүріп, «Мұнайлы ауданының құрметті азаматы» атанды.  

«ҚТЖ-Жүк тасымалы» ЖШС Маңғыстау филиалының басшысы болып бұған дейін Маңғыстау жүк тасымалы бөлімшесінің бас инженері қызметін атқарған тағы бір тәжірибелі теміржолшы Қарақат Жақанов тағайындалды.