Ерлік емей, немене?!
«Қазақстан теміржолшысы» газетінің тілшісі
Қазығұрт станциясындағы Орталықтандыру постының операторы Жәмила Жанақованың темір жолда табанды еңбек етіп келе жатқанына 40 жылға таяды. Биыл зейнет жасына жетіп отырған теміржолшының бір орында тапжылмай адал еңбек етіп, пойыздар қозғалысының қауіпсіздігін сақтауға өмірін арнауы – үлгі тұтарлық өнегелі жол.
Жылдар бойы қалыптасқан дағдысы, Орталықтандыру пост операторы ретінде ауысымға келген кезде алдымен ол жұмыс орнын толықтай тексеріп алады, башмактар, пломбалардың бәрі түгел ме, бағыттама бұрмасы жүріп тұр ма, бәрін мұқият тексереді. Дөңестен вагон тастаған кезде пост жақтан шығып кетпеуін қадағалайды. Тұйықтарда жеке меншік компаниялардың вагондарын маневр жасап алып кеткенде солардың жолын ашып, қауіпсіздікті қамтамасыз етіп отырады.
Былтыр 17 желтоқсанда күндізгі ауысымда жұмыста отырған ол тепловоз рұқсатсыз жолдан шығып келе жатқанын дер кезінде байқап, оны дереу тоқтатып, үлкен қауіптің алдын алады. Станция кезекшісінен бағдардың дайындығы туралы нұсқау алмай және маневрлік жұмыстың алдағы әрекетін анықтамай жатып, ереже сақтамай жүріп кеткен локомотивті Жәмила Жанақова байқап, жағдайды шұғыл бағалап, жылжымалы құрамды дереу тоқтатуға шешім қабылдаған. Оның сауатты және батыл шешімінің арқасында пойыздар қозғалысының қауіпсіздігі қамтамасыз етіліп, инфрақұрылым сақталды. Қарапайым теміржолшының ерлікке пара пар еңбегін басшылық жоғары бағалады.
1965 жылы Арыс ауданы Задария совхозында дүниеге келген кейіпкеріміз 7 балалы үлкен әулеттен шыққан. Әкесі Кеңес те кезінде көп жыл машинист болып еңбек етіпті. Сол балаларының ішінде әке жолын жалғаған Жәмила қызы болды. Бүгінде қызы тұрмыс құрып, 3 немере сүйіп отырған ардақты ана биыл Әйелдер мерекесі қарсаңында Компания басшылығы тарапынан Астанаға арнайы шақырту алып, құрметке бөленіп жатқан жайы бар.