Батыл шешім бағаланады

Теміржол саласында еңбек ету – қиын да қауіпті, әрі жауапкершілігі мол жұмыс. Осы сала мамандығын саналы түрде таңдау – оның ыстығы мен суығына дайын болу, соған мойынсыну деген сөз. Бүгінгі кейіпкеріміз Мәдениет Темірова осы қасиеттерге ие нағыз теміржолшы.

Атырау қаласында дүниеге келген ол мектеп бітірген соң педагогика саласында білім алып, біршама жыл еңбек етеді. Бірақ кейін тағдыр оны темір жолмен тоғыстырып, Ақтөбе көлік, коммуникация және жаңа технологиялар колледжінің «Теміржол көлігінде тасымалды және басқаруды ұйымдастыру» факультетін техник мамандығы бойынша бітіреді. Темір жолдағы еңбек жолын 2008 жылы Қызылжар разъезінде кезекші болып бастайды.  

Ал 2016 жылдан бері Атырау жүк тасымалы бөлімшесіне қарасты Қызылжар бекетінде СОБ электромонтері және разъезд кезекшісі қызметін атқарып келеді. Теміржол саласындағы жалпы еңбек өтілі – 18 жыл. Күндіз-түні қозғалыстағы темір жолда күтпеген оқиғалар көп болады. Солардың бірін Мәдениет те бастан кешті. Бірде күн қараңғылана бастағанда Тұманды – Қызылжар айналымында машинист Е.Түсіпов тепловоз айнасынан «Б» секциясындағы тоңазытқыш тұсынан жалын шығып келе жатқанын байқайды да, радиобайланыспен дереу станция кезекшісі мен кейін келе жатқан тепловоздарға хабарлайды. Сол мезетте хабарды алған Қызылжар станциясының кезекшісі Мәдениет Темірова шұғыл түрде шешім қабылдап, бекеттегі бос тұрған 1-ші жолды өртеніп келе жатқан локомотивті оқшаулауға дайындайды. Тепловоз тоқтаған соң вагондарды маневр жасап бөліп алып, өртке оранған тепловозды бос жолға, яғни қауіпсіз аймаққа шығарады. Машинист тепловозды қол тежегішпен тоқтатқан кезде Мәдениет те локомотив бригадасымен бірге өртті сөндіруге кіріседі. Өрт толықтай сөндіріліп, тепловоз үлкен апаттан аман қалады.  

Бүгінде Мәдениет Аманкелдіқызы жұмысын жалғастырып жатыр. Жарасымды отбасы бар, үш баланың анасы. Жолдасы Ерсайын «Атырау-Жарық» мекемесінде жүргізуші. Үлкен қызы Зарина тұрмыста, мамандығы – бастауыш сынып мұғалімі. Ал Назерке мен Батырхан – мектеп оқушылары. «Бала – өмірдің шырағы» деп отбасының қуанышы мен қызығына бөленіп жүріп жатыр. «Мәдениет жұмысына жауапты қарайды, ойы тұжырымды, адамгершілігі мол, ұжымдастар ортасында сыйлы жан» дейді ол туралы әріптестері. Басшылық тарапынан марапаттары бар және теміржол саласында 10 жыл мінсіз қызметі төсбелгісінің иегері.