Шынайы құрметке лайық
«Қазақстан теміржолшысы» газетінің тілшісі
Мамандығына адал. Отбасылық дәстүрді жалғастырудың жарқын үлгісін көрсетуші. Құрметті теміржолшы. Міне, осы сөздердің бәрі Мәриям Тәженоваға бағытталады.
Астана вагон пайдалану депосында отыз жыл еңбек етіп келе жатқан Мәриям болашақ мамандығын аузынан ана сүті кетпеген кезден-ақ таңдады деуге болады. Ол өзінің өмірін «Құрметті теміржолшы» белгісінің иегері әкесі Гелманның ізімен жүріп, теміржол саласымен байланыстырудан көрді. Еңбек жолын 1995 жылы Астана вагон пайдалану депосында құрылыс материалдарын сақтаушы болып бастады. Өзіне жүктелген міндетті жауапкершілікпен атқаратын елгезек жасты ұжым да бірден қабылдады. Кейін арнайы техникаға жанармай құю бағытын игеріп, онда бірнеше жыл табысты жұмыс істеді.
Мәриям бұл қызметінің қыр-сырын жетік меңгеріп алғаннан кейін оны депо басшылығы контейнерлер мен вагондарға қызмет көрсету операторы лауазымына ауыстырды. Тағылымдамадан сәтті өткеннен кейін Мәриям Гелманқызы өз бетінше жұмыс істей бастады. Бұл қызметінде де қоржынына мол тәжірибе жинады. Ал қазіргі уақытта ақпаратты өңдеудің дәлдігін, мерзімділігін және жылжымалы құрамның қозғалысын бақылауды қамтамасыз ете отырып, Астана вагон пайдалану депосында вагондарды орналастыру бойынша тексеруші болып жұмысын жалғастыруда. Биыл темір жолда тер төккеніне 31 жыл болыпты. Осы уақыт ішінде ол адал еңбегінің жемісін жеумен қатар, түрлі марапаттар иегері атанды.
– Теміржол саласы бүкіл отбасымыздың негізгі нәпақасына айналған. Үлкен әпкем саналы ғұмырының көп жылын темір жолға арнап, қазір ҚТЖ зейнеткері атанып отыр. Үш інім де еңбек әулетін жалғастырып, саланың дамуына өзіндік үлесін қосуда, – дейді кейіпкеріміз. Кәсіби қызметімен қатар Мариям Гелманқызы отбасы мен үй тірлігін де назардан тыс қалдырған емес. Бөлме өсімдіктерін өсіру, түрлі дәмді тамақтар пісіріп, дайындау – оның сүйікті ісі. «Мәриям Гелманқызының өз ісіне адалдығы, жастарға жанашырлығы, жұмыста жауапкершілігі оның ізін басқан жас мамандарға үлгі-өнеге болса, ұжымы үшін шынайы құрметке лайық», – деп жылы лебіздерін білдірді әріптестері.