Жамбыл белгі беру және байланыс дистанциясының құрылғылары жаңартылып жатыр
Жамбыл белгі беру және байланыс дистанциясының қызмет көрсету аумағы ауқымды. Түлкібас станциясынан Шу станциясына дейін созылып жатыр. Мына шеті Тараз станциясынан басталса, төменгі жағы Жаңатас станциясына дейін жалғасады. Соңғы жылдары дистанция құрылғылары кешенді түрде жаңарып жатыр.
– Жалпы, 573 шақырым біздің мамандарымыздың бақылауында. Оның ішінде автобұғатталатын 375 шақырым жол, 12 шақырымдай дара жол бар. Қос жолды телім 363 шақырымнан асып жығылады. Қызмет көрсетілетін учаскелерімізде 31 станция мен 1 блок-бекет орналасқан. 47 өткел болса, оның 6-уы күзетіледі, – деді дистанция бастығының орынбасары Азамат Найманов.
Жауапты маманның айтуына қарағанда, былтыр дистанция бойынша автоматика, телемеханика және байланыстың жаңа жүйелерін енгізуде бірқатар жұмыстар атқарылыпты. Мәселен, Тараз-Жаңатас учаскесінде дистанция қызметкерлерінің күшімен «АС-ДЦ» жүйесінің микропроцессорлық диспетчерлік орталықтандыруын тұрақты пайдалануға енгізді. Бұл жаңа құрылғыны бүгінде іске қосу-жөндеу жұмыстары да ойдағыдай жүзеге асуда.
– Сондай-ақ, Тараз-Шу және Тараз-Түлкібас учаскелерінде «43РТС-А2-ЧМ» үлгісіндегі аналогты радиостанцияларды «РЛСМ-10- 40» және «РВС-1-20» үлгісіндегі цифрлық радиостанцияларға ауыстыру жүргізілді. Тараз-Жаңатас учаскесінде «43РТС-А2-ЧМ» үлгісіндегі аналогты радиостанцияны «РС- 46МЦ» үлгісіндегі цифрлық радиостанцияға ауыстыру жүргізілді. Сондай-ақ, Құмшағал және Шайқорық станциялары бойынша «УМК-4» типті цифрлық күшейткіштерді орнату арқылы дауысзорайтқышпен хабарлаудың парк бойынша байланысын жаңғырту қолға алынды, – деп атап өтті Азамат Найманов.
Қашықтықтан көпбейінді техникалық құрылғылар кешенін жүргізу аппаратурасын орналастыру үшін барлық ескі ғимараттар контейнерлік үлгідегі модульдермен жарақтандырылыпты. Бұл жұмыс сапасын арттырумен қатар мамандардың жұмыс істеуіне ыңғайлы екен. Осы саладағы озық технологияның бірі – МС-04 DSL типті цифрлық арна құрайтын аппаратура да бүгінде дистанция пайдалануында. Тараз-Түрксіб және Тараз-Боранды учаскелеріне орналасқан осы аппаратураны жыл соңына дейін Тараз-Алматы учаскесінде де іске қосу жоспарланған. Қашықтықтан жұмыс істеудің әлеуеті өте жоғары, дистанцияда осы бағыттың дамуы мен өркендеуіне үлкен үлес қосып жүрген мамандар аз емес. Олардың қатарында, мысалы, Қ.Әміреев, Л.Абайдулина, В.Колпаков, М.Абилкаиров, А.Литвинов, Т.Дуйсембиев, Р.Борисенко сынды жоғары білікті мамандар- ды атап өткен ләзім. Еңбек жолын қатардағы электромонтер болып бастап, электромеханик, байланыс диспетчері, қашықтықтан басқарылатын өндірістік-техникалық бөлімінің инженері, магистральдық желі бөлімшесінің техникалық бөлімінің жетекші инженері сынды өндірістік тәжірибе баспалдақтарынан өткен Азамат Найманов та осал емес. 2014 жылдан бастап дистанция бастығының байланыс жөніндегі орынбасары. Биыл «ҚТЖ» ҰК» АҚ басшылығының шешімімен «Үздік маман» төсбелгісімен марапатталды.