Атыраулықтар да құммен әлек

Құммен күрес Атырауда да өзекті болып тұр. Маңғыстаудың жал-жал құм басқан сайын даласы болмаса да жаз айларында құм суырып, топырақ басатын жерлер мұнда да бар.

Сондықтан өңірдегі темір жол бойында құммен күрес жұмыстары – әсіресе жазғы мезгілде айтулы мәселенің бірі. Әсіресе, Атырау дистанциясы телімі бойынша Атырау-Исатай, рзд. №11-Сазанқұрақ, рзд. Нарын-рзд.№14, рзд. №15-станция Аққыстау, Құлсары жол дистанциясы Құлсары-Бейнеу теліміне қарасты рзд. №60, Толтыр станциясы, рзд. №461, рзд. Шоқпартоғай, Толтыр станциясы-№465 разъезд аралығында жолды құм басу жағдайы соңғы он күндікте күшейіп тұр. Жаз шыға аңызақ жел, үнемі борап тұратын топырақ пойыздың қалыпты жылдамдықпен жүруіне кедергі келтіреді. 

Сондықтан бүгінгі таңда жолшылар бригадалары құм басқан жерлерді аршуға жұмылдырылып, олар жолды тазартуға СМ-2, СДПМ қар тазалау машиналарын қолданып жатыр. Бірақ техниканың шамасы жете бермейтін жерлерді қолмен тазалауға тура келеді. Топырақ жауын сумен араласса, балшыққа, ұзақ жатып қалса, тасқа айналады. Сондықтан оны дер кезінде аршып отырудың маңызы зор. Биылғы көктемгі тексеру барысында да осы мәселеге ерекше мән берілді және күн тәртібінен түскен жоқ. 

Бас ревизор Жәнібек Сауровтың айтуынша, аймақтың табиғи ерекшеліктеріне сәйкес батыс өңірлерінде жолдарды құмнан тазарту жұмыстарын үнемі жүргізіп отырған абзал, алайда олар соған арналған арнайы құралдармен жасалуы тиіс, әйтпесе өмірге қауіпті жағдай орын алады. Сондықтан, жолды құмнан тазарту жұмыстарын технологиялық талапқа сай ұйымдастыру қажет.