Тәуелсіздік күніне тарту: Қызылордада еңбек озаттары марапатталды
Қызылорда облысы бойынша меншікті тілші
Тәуелсіздік күніне орай Қызылорда магистральдық желі бөлімшесінде салтанатты мерекелік жиын өтті. Ұлық мерекеде еңбек озаттары марапатталып, сала ардагерлері төрден орын алды.
Әнұранмен ашылған жиын барысында бөлімше директоры Ербол Сәулебеков әріптестерін ел тарихындағы айтулы мерекемен құттықтап, теміржолшылардың ел экономикасындағы ерен еңбегіне ерекше тоқталды. Бұдан кейін салалық кәсіпті терең меңгеріп, бөлімшенің дамуына үлес қосып жүрген бірқатар еңбек озаттары алғыс хаттармен және бағалы сыйлықтармен марапатталды. Кезекпен сөз алған бөлімше басшылары да әріптестеріне алғыстарын білдіріп, мерекелік лебіздерін жолдады.
Сонымен кәсіподақ қозғалысын дамыту мен еңбек адамының мүддесін қорғауға сіңірген еңбегі үшін Қызылорда теміржол вокзалының басшысы Жарас Қойшығұловқа ҚР Кәсіподақтар федерациясы төрағасының Құрмет грамотасы табысталса, бөлімшенің «Әйелдер қоғамы» атынан бес теміржолшыны қоғам төрайымы Гүлзада Жақсылықова марапаттады. Ал желі бойындағы станция-бекеттерде қызмет атқаратын теміржолшыларға арналған марапаттар мен арнайы сыйлықтар өз жұмыс орындарында табысталатын болды. Марапат төріне көтерілген озаттарға бөлімше басшылығы мен кәсіподақ ұйымының атынан бағалы сыйлықтар берілді.
