Тарихпен бірге жасасқан...

Шетпелік Байпақовтар әулеті – Маңғыстау теміржолының тарихымен бірге аты аталатын өңірдегі алғашқы теміржолшылар әулеті. Алпыс жылдан астам уақыт өтсе де ұрпақтары әлі күнге ата дәстүрін жалғап келе жатқан әулеттің екі азаматына Шетпенің жаңа вокзалында арнайы тақта орнатылды.

Ескерткіш белгі Шетпе теміржолының алғашқы іргетасын қаласқан Жаңай Байпақов пен оның інісі Азанқұл Байпақовтың құрметіне қойылды. Мемориалдық тақтаның ашылу салтанатына жергілікті теміржолшылар, ағайынды Байпақовтардың көзін көрген ардагерлер қатысты.  

1917-1983 жылдар өмір сүрген Жаңай Байпақов түбекке теміржол тартыла бастағанда Түркіменстан теміржолында еңбек етіп жүрген жерінен артынып-тартынып кіндік қаны тамған тарихи отанына оралады. Бауырлары, отбасымен бірге келген ол жаңадан ашылған Шетпе станциясының бастығы болып тағайындалады. Ал 1925 жылы туып, 2004 жылы дүниеден өткен бауыры Азанқұл Байпақов болса Шетпенің тұңғыш станция кезекшісі болып қызметін бастайды. Екеуі де зейнетке шыққанша ақ-адал еңбек етіп қана қоймай, бүкіл бала-шағасын тәрбиелеп, түбек теміржолының жұмысына қосады.  

– Бұған дейін ауылымызда әкемнің інісі, Құрметті теміржолшы, ҰОС және еңбек ардагері Азанқұл ағамның атында көше болды. Ал КСРО Құрметті теміржолшысы, тыл және еңбек ардагері әкеміздің де атына көше беру туралы сөз болғанмен, аяқсыз қалып келді. Бүгін міне, бұл кісілердің есімі жазылған ескерткіш тақта вокзалға ілініп жатыр. Шетпе станциясы ашылғанда бірі алғашқы басшысы, екіншісі тұңғыш станция кезекшісі болған бұл кісілердің қай жағынан да еңбегі орасан. Бала кезімізден сол кісілердің тәрбиесімен өсіп, біз де теміржолшы болдық, Құрметті теміржолшы атандық, қазір бейнеттің зейнетін көріп жүрміз. Осы екі ағайындыдан тоғыз бала тарады. Соның көбі теміржолшы болды. Отбасымыздан бас-аяғы он бес шақты теміржолшы шықты. Бүгінгі көрсетіліп жатқан құрметке біз ұрпағы дән ризамыз және олардың атына кір келтірмеу – бізге парыз, – деп сөз сөйледі шетпелік ардагер Ази Жаңайұлы Байпақов.