Жамбылдық теміржолшылардың қырық пайызы екпе алды
Жамбылдық теміржолшылар арасында қауіпті індетке қарсы вакцинациялау шаралары әлі де жалғасуда. Соңғы деректерге сүйенсек, өңірдегі сала мамандарының 40 пайызға жуығы коронавирусқа қарсы екпе салдырып үлгерген. Жамбыл жүк тасымалы бөлімшесінің директоры Үмітбек Рысбековтің айтуынша, күні кешеге дейін аймақ теміржолшыларының 34,4 пайызы екпе алып үлгерген.
«Бізде 3500-дің үстінде теміржолшы еңбек етеді. Қазіргі таңда 1209 адам вакцина алып үлгерді. Олар екпенің түрін өздері таңдауда. Өзім алғашқылардың қатарында Біріккен Араб Әмірліктерінде өндірілген Sinopharm қытай вакцинасының бірінші, екінші компоненттерін қабылдадым. Күн сайын 30-40 жұмысшы Тараз локомотив пайдалану депосының медициналық пунктінде екпе салдырып жатыр», – деді ол.
Індет тарап басталғалы бері бөлімшенің 12 теміржолшысы «аунап тұрған» екен. Қуантатыны, олардың барлығы сауығып шыққан. Бөлімше басшысы ҚТЖ ұлттық компаниясы әу бастан теміржолшылардың денсаулығына аса мән беретінін жеткізді. «Қажет уақытта қашықтықтан қызмет еттік. Ондай режимге көшу мүмкін емес мамандарымызды керекті медициналық препараттармен де, бұйымдармен де толықтай қамтамасыз еттік. Соның ішінде қорғаныш маскалары, антисептиктер, халаттар мен қолғаптар үзіліссіз таратылып тұрды, нәтижесінде вирус жұқтырған теміржолшылардың да саны төмен болды» дейді. Ал Жамбыл магистральдық желісінде еңбек ететін 4 мыңнан астам адамның 1524-і вакцинациямен қамтылған. Бөлімше басшысы Сұлтан Боранбаев бұл жалпы көрсеткіштің 37 пайызын құрайтынын жеткізді. «Расында, екпе салдыру және қай екпені таңдау – әркімнің еркіндегі дүние. Десе де, екпе салдырғысы келетін мамандарымыздың қатары күн санап арту үстінде. Өйткені, олар денсаулықтарына бейжай қарауды құп көрмейді», – деді ол.