Жамбылда техникалық сабақтар тиянақты өтеді
Жамбыл жүк тасымалы бөлімшесінде бекітілген жоспарға сәйкес локомотив бригадаларының стандартты емес жағдайдан шығу бойынша іс-қимылдары техникалық сабақтарда үнемі пысықталып тұрады. Қолданыстағы бұйрықтарды, нұсқаулықтарды, лауазымдық міндеттерді орындау барысы да назардан тыс қалмайды. Ай сайын жол дистанциясы, сигнал беру және байланыс дистанциясы, электрмен жабдықтау дистанциясымен бірлесіп, «Жолдағы адам» ақпарат жүйесі, автоматты локомотивтік сигнал беру кодтарының істен шығуы бағыттарындағы жұмыс нәтижелері қаралады. Жыл басынан бері Тараз, Шу станцияларында тұрғындар арасында темір жол бойында жүріп-тұру, мал жаю қағидалары туралы бірнеше түсіндіру жұмыстары жүргізілген. Локомотив бригадаларымен бірге техникалық сабақтарда пойыздар қозғалысының қауіпсіздігін бұзу мен қозғалыс кестесіндегі кідірістер жағдайы мұқият зерделеніп тұрады. Сонымен қатар, локомотивтердің техникалық базасын көтеру және олардың мәдени және эстетикалық ахуалын жақсарту үшін профилактикалық іс-шаралар тұрақты ұйымдастырылады. Биылдыққа локомотив бригадаларының лауазымдық міндеттерін орындау аясындағы маневрлік жұмыстарды жүргізу кезінде және қызмет көрсету учаскелеріне, оның ішінде шалғай станцияларға 12 рет кенеттен тексеру шаралары жүргізіліпті. Оның барысында 16 бұзушылық анықталып, кінәлілер тәртіптік жауапкершілікке тартылған. Ақпан наурыз айларында «ҚТЖ - Жүк тасымалы» ЖШС- нің барлық филиалдарында «Вагонның (тұтқалардың, сатылардың, алаңдардың) технологиялық жабдықтарының жарамдылығы» айлығы өткізілген. Сонымен бірге Денсаулық сақтау министрінің бұйрығы аясында ауысым алдындағы және ауысымнан кейінгі міндетті медициналық қарап-тексерулерді өткізу қағидалары мен кезеңділігі пысықталған. Сондай-ақ, Жамбыл депосы бойынша локомотивтерді қажетті құралдармен, жөндеу жиынтықтарымен қамтамасыз ету үшін локомотив паркін бір жолғы тексеру жүргізілді. Бұл шара аясында локомотивтерді, оның ішінде кабина мен машина бөлігін жарықтандыру шамдарымен, жарық таблоларымен, прожекторлық шамдармен қамтамасыз ету назарға алынған. Ал жақында депо бойынша командалық-инструкторлық құрамның күшімен локомотив бригадаларына нұсқаулықтар өткізілген. Онда пойыздар қозғалысы қауіпсіздігінің бұзушылықтарына жол берілген ситуациялық схемалар егжей-тегжейлі таныстырылған. Жалпы, локомотив бригадаларына арналған техникалық сабақтарда пойыздар қозғалысының қауіпсіздігін бұзу және қозғалыс кестесіндегі іркілістер жағдайлары тұрақты талданады. Локомотив бригадалары теміржол өтпелеріне жақындаған кезде әрбір 10-15 секунд сайын және өткелдер мен қауіпті орындардан өткенге дейін дыбыстық сигналдар беруі қадағалады.