Арыс қаласындағы «Дендросаябақ» алдына жәдігер паровоз қойылды

Ел Тәуелсіздігінің 30 жылдығымен тұспа-тұс келген Арыс қаласының 65 жылдық мерейтойы қарсаңында қалаға кіреберістегі «Дендросаябақ» алдына темір жол тарихынан сыр шертетін, бүгінде көненің көзіне айналған паровоз ескерткіші қойылды. Ашық аспан астындағы мұражайға орналастырылған паровоздың салтанатты лентасын ҚР Парламенті сенатының депутаты Әлімжан Құртаев, Түркістан облысының әкімі Өмірзақ Шөкеев және Арыс қаласының құрметті теміржолшылары қиды. Бұл айбынды монумент теміржолшылар қаласы атанған барлық арыстық теміржолшылардың ғасырдан астам қажырлы еңбегіне деген құрмет пен тағзым болмақ. 1946 жылы Улан-Уде қаласындағы зауыттан шыққан, салмағы жүздеген тоннаны құрайтын отарбаны Шығыс Қазақстан облысы, Шемонайха станциясынан әкелген. Жиырмасыншы ғасырдың басында қазақ халқының тұрмысына дендеп енген темір жол Арыс қаласына өткен ғасыр басында тартылған «Орынбор-Ташкент» темір жолының құрылысымен келді. Сол кезден бастап күрежолдың бойындағы Арыс станциясы үлкен тораптық станцияға айналып, жергілікті халық үшін теміржолшы атакәсіпке айналды. Бүгін, міне, арыстық теміржолшылардың ерен еңбегіне көрсетілген құрмет ретінде тұғырға қонған көнекөз отарба арыстықтар үшін айтулы оқиға болып, ардагерлер ескі достарымен кездескендей көздеріне жас алды. Салтанатты шарада сөз алғандар қазақстандық теміржолшылардың ерен еңбегін кейінгі буынға үлгі етуді көздейтін мұндай бастамалардың құндылықтарды дәріптеу арқылы ұрпақтар сабақтастығын сақтап, жас буынды тәрбиелеуге ықпалы зор болмағын тілге тиек етті. Сондай-ақ, отарбаның Арыс қаласына жеткізілуіне тікелей ықпал еткен «Қазақстан темір жолы» ҰК» АҚ басқарма төрағасы Нұрлан Сауранбаевқа алғыс айтылды. Арыс қаласы әкімінің ұсыныс білдіруімен жобаны сәтті жүзеге асыруға Құрметті теміржолшы Мақсұт Іскендіров бастаған ардагерлер, тарихтың тірі куәгерінің тұғырға жеткізіліп, орнатылуына демеушілік жасап, материалдық көмек көрсеткен Ермекбай Ермановтың да зор үлесі аталып өтті. Бұдан бөлек, Арыс қаласындағы Теміржолшылар паркі де қайта жаңғырды. Өткен ғасырдың 60- шы жылдары бой көтерген саябақ Арыс қаласының 65 жылдығына орай мүлдем жаңа кейіпке енді. Орындықтар ауыстырылып, балаларға арналған түрлі ойын аттракциондары орнатылды. Сондай-ақ жаяу жүргіншілерге арналған жол кеңейтіліп, жаңартылды және мұнда озық үлгідегі жарықтандыру технологиясы қолданылған.