Бадам станциясында тұратын ардагер әлеуметтік қолдаудан тыс қалып отыр
«Қазақстан теміржолшысы» газетінің тілшісі
Оңтүстікте тұратын Ұлы Отан соғысының ардагері, Құрметті теміржолшы Қалмен Мұратов биыл 98 жасқа толды. Жеңіс күні қарсаңында ұрпақтарына хабарласып, ақсақалдың хал-жағдайын білдік.
Бүгінде Бадам станциясында тұратын Қалмен ақсақал тамырын тереңге жайған алып бәйтерекке айналған. Қариядан 6 ұл мен 2 қыз тарап, солардан бүгінде 32 немере, 10 шөбере сүйіп отыр екен.
1942 жылы 8 класты бітірген 18 жасар бозбала әскер қатарына шақырылады. Алдымен Аягөз станциясында курста 6 ай оқып, сержант шенін алады. 1943 жылдың қазан айына дейін сол станцияда Сергиополь қалашығында солдаттарды соғысқа даярлау, оқу-жаттығу курсынан өтеді. Сосын ғана батысқа аттанып, Беларусь майданында соғысқа кіреді. 1944 жылы Витебск қаласының маңында болған ауыр шайқаста сол қолынан жараланып, госпитальға түседі. Осы соғыста көрсеткен ерлігі үшін бірінші дәрежелі «Отан соғысы» орденімен марапаттады. Соғысты жеңіспен аяқтап, «1941-1945 жылғы Ұлы Отан соғысында Германияны жеңгені үшін» медалін өңіріне тағып елге оралған майдангер Арыс вагон депосына бас кондуктор болып жұмысқа орналасады. Осы қызметте 1984 жылы зейнетке шыққанға дейін тапжылмай еңбек етеді.
Соғыста алған марапаттар қа- тарын «Құрметті теміржолшы» белгісі, «Құрмет белгісі» ордені мен «Еңбек ардагері» медалі толықтырып, бүгінде ұзақ жылғы бейнетінің зейнетін көруде.
Алайда қарияның ұлы Батыр соғыс ардагеріне лайықты деңгейде көңіл бөлінбейтінін айтады. «Мереке қарсаңында ғана 30-40 мың теңге береді, басқа уақытта ешқандай көмек жоқ. Ұлы Отан соғысының ардагері ретінде үй де, жер де берілген емес» деген баласы жүзге жақындаған қария сый-құрметтен қағылып отыр деген назын жеткізді. Ақсақалдың денсаулығы бір қалыпты, үйге өзі кіріп-шығады.