Шығыста 500 бала оқу құралымен қамтылды
Абай облысы бойынша меншікті тілші
Республика көлемінде өтіп жатқан «Мектепке жол» атты ауқымды акцияға семейліктер де үн қосты. Семей ЖТ бөлімшесі мен жергілікті салалық кәсіподақ ұйымының ұйымдастыруымен мектеп табалдырығын алғаш аттайтын бүлдіршіндерге оқу құралдары салынған сөмкелер табыс етілді.
Бұл күні бөлімше ауласына балақайлар мен олардың ата-аналары, ата-әжелері мол жиналды. Айта кетерлігі, биылғы балалар жылына орай бірқатар шаралар ұйымдастырылыпты. Балақайлар үшін арнайы шақырылған мультфильм кейіпкерлері қызықты сергітетін жаттығулар жасатып, би билеттірді. Кәсіподақ белсенділері табыс еткен сөмке толы оқу құралдарымен қатар, тәтті шоколадтар таратылды.
– Биылғы «Мектепке жол» шарасының ауқымын кеңейтуге тырыстық. Жалпы, жыл бойы Президент тапсырмасына сәйкес, балалар жылы аясында түрлі іс-шаралар тұрақты өткізіліп келеді. Бүгінгі ұйымдастырылып отырған акция да соның бір парасы. Бұл жолы Семей өңірі бойынша бірінші сынып табалдырығын аттайтын 300, ал барлық Шығысты қоса алғанда 500 балақай оқу құралдарымен қамтылды. Негізінен әлеуметтік тұрғыдан аз қамтылған отбасылардың балаларына басымдық берілді, – дейді Семей ЖТ бөлімшесінің салалық кәсіподақ ұйымы төрағасы Алик Тұрсынұлы.