Өндірісте жарақат алған азаматтарға қаржылай көмек көрсетілді
«ҚТЖ-Жүк тасымалы» ЖШС Шымкент филиалында мекемелерде өндірісте жарақат алған 11 азамат есепте тұрады. Дүниежүзілік еңбек қорғау күніне орай оларға 30 000 теңге көлемінде қаржылай көмек көрсетілді.
Олардың қатарында Түркістан локомотив пайдалану депосынан Құрбан Оспанов, Қазығұрт станциясынан Есқали Мауленов, Арыс вагон пайдалану депосынан ІІ топ мүгедегі Арыстанбек Досанов және Арыс локомотив пайдалану депосынан Үсен Жақыпбеков, Асқарбек Садықбеков, Мұрат Тоғызбаев, Рашид Қазиев, Махамбетжан Бейсембаев, Нина Алтунина, Ринат Зиянуров, Нақып Абылаев сынды азаматтар бар.
Ал Шымкент магистральдық желі бөлімшесінде өндірісте зардап шеккен 29 азамат есепте тұрады, барлығы дерлік жарақат деңгейіне қарай ай сайын жәрдемақы алып отыр. Атаулы күн қарсаңында жұмыс барысында 100% жарақат алған Тұрғанай Айдарханова емдік шипажайға жолдама алып, аяқ протезін жасатып, мүгедектер арбасымен қамтылған, ал 80% жарақат алған Бейсенкүл Алдыбекова және 50% жарақат алған Серік Бекмурзаев та аяққа жаңадан протез қойғызса, 50% жарақаты бар Махира Нарметова сәуір айында Ташкент қаласында ем алды. Сонымен қатар есепте тұрғандар арасында көлікпен жүретін азаматтар тұрақты бензин талонымен және дәрі-дәрмекпен ай сайын қамтамасыз етіліп тұрады.
Сонымен қатар атаулы күн Шымкент айналым депосы ТД-16 мекемесінде де аталып өтіп, электровоз машинисі Лазизжон Сайденов, Бахытжан Бектемиров, Сүндет Қыдырәлі, Сергей Варва секілді бірқатар азаматтардың еңбек қорғауға қосқан үлесі марапатталып, «Теміржол – қауіпті аймақ» тақырыбында сурет салған машинистер балалары Мөлдір Балғабай мен Назерке Балғабай, Бахытжан Бектемиров кәсіподақ тарапынан сыйлық алды.
