Теміржолшылар ардагерге көмек көрсетті
"Қазақстан теміржолшысы" газетінің Жамбыл облысындағы меншікті тілшісі
ТЧЭ-30 – Шу локомотив пайдалану депосы Шоқпар станциясында тұратын ардагер-теміржолшы Тынышбек Сатылғановтың үйіне жылу жүйесін тарттырып беріп, үлкен бір сауапты іс жасады.
Ақсақалдың айтуынша, жылу құбырын жүргізіп, батареялар қоймаған соң, қыстай көмір шақ келмей келген екен. Отынды қанша жерден үзбей жақса да, бөлмелер жылымай, күн жылығанша үй ішінде қабат-қабат киініп, оранып, қыстан шығатын қариялар қазір үйде бір жейдемен отырып, рахаттанып қалғандарын айтып мәз болды. Айта кету керек, Шу ауданындағы елді мекендердің 60 пайызы ғана газдандырылған. 18 елді мекенге дейінгі газ құбырын тартып беру үшін 5 837,6 миллион теңге қаржы бөлініп, үлкен 2 жоба жүргізілуде. Оның ішінде қазір 7 ауыл газбен қамтылып, 4-еуінде құрылыс жұмыстары аяқталды. Ал Шоқпар кенті мен Шоқпар станциясы, Бәйдібек, Ақтасты, Бөлтірік, Балуан Шолақ, Далақайнарға әлі табиғи газ құбырының желісі тартылған жоқ.
Тынышбек Сатылғанов қария теміржол саласында жарты ғасырға жуық еңбек еткен. Биыл 80 жасқа келген ақсақал көз жанары нашарлап, І топтағы мүгедектік алғалы бері жүріп-тұру қиынға соққан.
– Шу локомотив пайдалану депосының басшысынан бастап, барлық жұмысшыларына, маған қол ұшын созған кешегі ұжымыма ризашылығымды жеткізгім келеді. Өзім ес білгелі темір жолды жағаладым. Алғаш машинистің көмекшісі, кейін машинист болып жұмыс істедім, – дейді ардагер теміржолшы.
Қарияның жұбайы Сейсенкүл Айдарқызы да теміржол саласында жұмысты үлестіруші болып еңбек етіпті. Шу локомотив пайдалану депосының бастауыш кәсіподақ ұйымы бір үйдегі екі ардагер теміржолшыға тиісті көмектерін көрсетіп, жыл аралатып сауықтыру орындарына жолдама беріп тұрады.